Rannsóknarnefnd samgönguslysa hefur komist að þeirri niðurstöðu að banaslys sem varð nálægt bænum Krossi í Berufirði 9. mars í fyrra hafi orðið vegna þess að ekið var á röngum vegarhelmingi. Tveir bílar rákust þar harkalega saman skömmu fyrir hádegi. Þetta kemur fram hjá Austurfrétt.

Einn lést í slysinu en þrír aðrir slösuðust alvarlega. Þeir voru fluttir með þyrlu á sjúkrahús í Reykjavík eftir áreksturinn.

Í skýrslu nefndarinnar kemur fram að ökumaður Benz-bifreiðar, sem var á leið í suðvesturátt, hafi af óþekktum ástæðum farið yfir á vinstri akrein rétt áður en komið var að vægri beygju á veginum. Á sama tíma var Volkswagen sendibifreið að koma úr gagnstæðri átt og lentu bílarnir beint framan á hvor öðrum í mjög hörðum árekstri.

Rannsóknarnefndin bendir einnig á að báðir ökumenn hafi verið á meira en hundrað kílómetra hraða þegar slysið varð, sem hafi aukið alvarleika árekstursins.

Talið er líklegt að ökumaður Benz-bifreiðarinnar hafi ekki haft fulla athygli á akstrinum á þessum tímapunkti og jafnvel ekki gert sér grein fyrir því að hann væri kominn yfir á rangan vegarhelming.