Her Bandaríkjanna hefur ekki notað Ísland sem aðstöðu fyrir hernaðaraðgerðir gagnvart Íran. Þetta kemur fram í svari utanríkisráðuneytisins við spurningum Mannlífs.

Á laugardaginn hófu Bandaríkin og Ísrael sameiginlegar loftárásir á Íran þar sem æðsti klerkur landsins var myrtur, sem og yfir hundrað stúlkur í grunnskóla. Íran hefur svarað árásunum af hörku með loftárásum á Ísrael og bandarískar herstöðvar í nágrannalöndum sínum.

Árið 2017 var varnarsamingnum á milli Bandaríkjanna og Íslands, breytt, án aðkomu þingsins en Guðlaugur Þór Þórðarson var þá utanríkisráðherra. Breytingin fól í sér að Bandaríkin fengu, án endurgjalds, aðgengilegar starfsstöðvar eða Operational Locations eins og það heitir á ensku, sem herinn hefði óhindraðan aðgang að og notkun á, og það án þess að Ísland fái greitt fyrir.

Mannlíf spurði utanríkisráðuneytið hvort Bandaríkjaher hefði eða hyggðist nýta Ísland á einhvern hátt við árásir sínar á Íran. Hvort það standi til að nýta íslenska grund, lofthelgi eða landhelgi Íslands, við árásir á Íran.

Ægir Þór Eysteinsson, fjölmiðlafulltrúi utanríkisráðuneytisins svaraði stutt en skorinort:

„Nei. Það hefur ekki verið gert og engin áform eru uppi um slíkt.“

Aðspurður hvort íslensk yfirvöld hefðu neitunarvald ef Bandaríkin hefðu hug á að nota Ísland í þeim tilgangi að ráðast á Íran, svaraði Ægir Þór:

„Ísland er fullvalda ríki og hefur fullt forræði yfir eigin landssvæði og landhelgi landsins.“

Skyndimótmæli hafa verið boðuð fyrir framan utanríkisráðuneytið í dag, klukkan 16:00, þar sem þess verður krafist að utanríkisráðuneytið fordæmi árásir Bandaríkjanna og Ísraels á Íran.