Á dögunum var fagnað útgáfu bókarinnar Ævintýri Freyju og Frikka eftir Felix Bergsson.

Felix er auðvitað landsþekktur sem útvarps- og sjónvarpsmaður, skemmtikraftur og söngvari. Hann er þó minna þekktur sem rithöfundur en þetta er aðeins önnur bókin eftir hann sem kemur út, sú fyrri var Augasteinn sem kom út 2003.

Það er Drápa sem gefur bókina út og eins og vera ber var útkomu bókarinnar fagnað vel. Útgáfustuðið fór fram í Pennanum við Skólavörðustíg og fjöldi fólks, og barna, var mættur til að samfagna með Felix.

Kári Gunnarsson er myndhöfundur bókarinnar og var hann að sjálfsögðu líka á staðnum og þeir félagar árituðu bækur í gríð og erg og gestir gæddu sér á dýrindis tertu.