Lögreglan í Uddevalla í Svíþjóð leitar nú af miklum krafti að 18 ára stúlku, Hönnu en tilkynnt var um hvarf hennar þann 6. janúar. Hún sást síðast síðdegis þann dag.
Síðan hefur verið leitað að henni með aðstoð leitarhunda, dróna og annarra úrræða.
„Við höfum ekki fundið hana. Áður höfðum við ekkert afmarkað leitarsvæði, en síðdegis í gær bárust almenningi þær upplýsingar að fatnaður sem mögulega tilheyrir henni hafi fundist,“ segir Johan Håkansson hjá lögreglunni.
Fatnaðurinn fannst á útivistarsvæði. Að svo stöddu veit lögregla ekki hvað kann að hafa komið fyrir stúlkuna og enginn grunur liggur fyrir um refsivert brot.
„Það er erfitt fyrir okkur að staðfesta nokkuð á þessari stundu. Þar til við höfum skýra mynd af því sem gerðist útilokum við ekkert. Við vinnum án forsendna þar til við teljum okkur hafa góða yfirsýn yfir atburðarásina,“ segir Håkansson.
Sérstök lögregluaðgerð
Síðdegis hóf lögregla sérstaka aðgerð vegna málsins. Nú stendur yfir umfangsmikil leit í Uddevalla þar sem leitarhópar, drónar og hundasveitir fara yfir stórt svæði. Heimavarnarsveitin tekur einnig þátt í leitinni.
„Staðan er óviss. Hingað til hefur ekkert komið fram sem bendir til afbrots, en við vitum ekki hvað gerðist eða hvar konan er. Við höfum skilgreint leitarsvæði sem við byggjum aðgerðir okkar á,“ segir Jens Andersson hjá lögreglunni.
Lögregla hefur birt lýsingu á stúlkunni.
„Stúlkan er með sítt, ljósskollitað hár, meðalhávaxin, um 166 sentímetrar á hæð. Hún var klædd í gallabuxur og brúna peysu þegar hún hvarf. Allar ábendingar eru vel þegnar og er fólk hvatt til að hafa samband í síma 114 14. Ef málið er brýnt er beðið um að hringja í 112,“ segir á heimasíðu lögreglunnar.
