Haustið er gengið í garð og með kólnandi veðri fara hlýrri flíkur og heimilisvörur aftur í notkun eftir sumarið. Kasmírpeysur, regnkápur, inniskór og hlý teppi koma úr geymslum en ýmislegt af þessu þarfnast þrifa áður en það er tekið í reglulega notkun.
Good Housekeeping hefur tekið saman sex hluti sem gjarnan gleymast í þvottinum og ráðleggingar um hvernig best sé að halda þeim hreinum án þess að valda skemmdum.
1. Baðsloppar
Baðsloppar geta safnað í sig svita, lykt og bakteríum og ættu þeir sem nota slopp reglulega að þvo hann að minnsta kosti einu sinni í viku. Mælt er með því að þvo hann við hæsta hitastig sem þvottamerkingar leyfa og snúa honum á rönguna.
Mýkingarefni ætti að forðast þar sem það getur dregið úr rakadrægni efnisins. Loðna sloppa má setja í þurrkara ef þvottamerkingar leyfa.
2. Regnkápur
Margir þvo regnkápur sjaldan eða aldrei þótt þær séu mikið notaðar. Almennt er ráðlagt að þvo regnkápu eftir um tíu skipti í notkun.
Mikilvægt er að fylgja þvottaleiðbeiningum framleiðanda þar sem vatnsheld húðun getur verið viðkvæm. Ef sérstakar leiðbeiningar vantar er yfirleitt öruggast að nota kalt og milt þvottakerfi ásamt þvottaefni sem ætlað er vatnsheldum fatnaði. Mýkingarefni getur skemmt vatnshelda húðun.
3. Rafmagnsteppi
Rafmagnsteppi geta safnað í sig svita og óhreinindi en vegna rafbúnaðarins þarf að gæta sérstakrar varúðar við þrif.
Fylgja skal leiðbeiningum framleiðanda nákvæmlega. Sum teppi mega fara í þvottavél eftir að stjórnbúnaður hefur verið fjarlægður. Þá er gjarnan mælt með köldu og viðkvæmu þvottakerfi og litlum eða engum snúningi. Teppið verður að vera fullkomlega þurrt áður en það er tengt aftur við rafmagn.
4. Kasmírpeysur
Kasmír er viðkvæmt efni og rangur þvottur getur auðveldlega skemmt flíkina. Nota skal þvottaefni fyrir ull og viðkvæman fatnað og fylgja alltaf þvottamerkingum.
Ef vélarþvottur er leyfður er best að snúa peysunni á rönguna, setja hana í þvottapoka og nota kalt ullarkerfi með mjög litlum snúningi. Peysuna ætti síðan að þurrka liggjandi og móta reglulega meðan hún þornar.
5. Rússkinnsskór
Rússkinnsskór eiga ekki heima í þvottavélinni. Leyfa skal þeim að þorna áður en óhreinindi eru fjarlægð með sérstökum rússkinnsbursta. Erfiðari bletti má meðhöndla með hreinsiefni sem ætlað er rússkinni.
Þegar skórnir eru orðnir hreinir getur verið skynsamlegt að bera á þá varnarúða gegn vatni og óhreinindum.
6. Inniskór
Inniskór eru gjarnan mikið notaðir yfir kaldari mánuðina en gleymast auðveldlega þegar kemur að þrifum.
Sumir mega fara í þvottavél en aðra þarf að blettahreinsa með volgu sápuvatni og mjúkum bursta eða örtrefjaklút. Mælt er með því að þrífa inniskó um einu sinni í mánuði og oftar ef þeir eru reglulega notaðir berfættir.
