Hin 35 ára gamla Taylor Gosnell hefur verið handtekin og ákærð fyrir tilraun til manndráps og vopnaburð við ofbeldisbrot, eftir að hafa ráðist af miklu offorsi gegn tveimur ungum börnum sínum á heimili þeirra í Spartanburg County um síðustu helgi. Börnin, sem eru þriggja og sex ára gömul, hlutu lífshættulega áferka í árásinni og liggja nú þungt haldin á sjúkrahúsi.
Voru heima svöng
Samkvæmt upplýsingum frá lögreglu hófst málið þegar sex ára gamall sonur Gosnell hringdi í ömmu sína til að láta vita að hann og yngra systkini sitt væru ein heima og svöng. Við það flýttu amma barnanna og fyrrverandi kærasti Gosnell sér á vettvang og gerðu lögreglu viðvart.
Lögreglumenn sem komu fyrstir á vettvang lýstu aðkomunni sem skelfilegri. Blóð var út um allt hús, sjónvörp og speglar höfðu verið mölvaðir og glerbrot lágu á gólfum. Inni á heimilinu fundust börnin tvö alblóðug með fjölda djúpra stungusára og skurða. Í dómsmálinu kom fram að sárin á börnunum væru svo djúp að sum þeirra næðu inn að beini. Sjöunda umdæmissaksóknaraembættið greindi frá því að sex ára drengurinn gæti þurft að gangast undir aflimun á fingrum og hugsanlega handlegg vegna alvarleika áverkanna.
Börnin voru flutt í skyndi á Prisma Health barnaspítalann í Greenville þar sem þau hafa þegar gengist undir aðgerðir og eiga von á frekari skurðaðgerðum. Læknar telja að þau muni lifa árásina af.
Andlegt ástand
Taylor Gosnell sneri aftur á vettvang skömmu eftir að lögreglu bar að garði. Hún sýndi merki mikils andlegs óstöðugleika, talaði hratt og fullyrti að hún upplifði sýnir og heyrði raddir. Rannsókn lögreglu á samfélagsmiðlum hennar sýndi að hún hafði birti færslur örfáum klukkustundum fyrir árásina þar sem hún grátbað fólk um að hætta að hlæja að sér. Saksóknarar telja að hún hafi verið í alvarlegu geðrofi þegar árásin átti sér stað, en hún er sögð hafa beitt bæði hnífi og hafnaboltakylfu. Gosnell var flutt með sjúkrabíl til geðmats áður en hún var vistuð í fangelsi.
Í ljós hefur komið að Gosnell var laus gegn tryggingu þegar árásin átti sér stað, en hún var handtekin í febrúar 2024 og ákærð fyrir að stofna lífi barna sinna í hættu og vanrækslu.
Gosnell var neitað um tryggingu við fyrstu fyrirtöku og verður hún áfram í gæsluvarðhaldi í Spartanburg County Detention Center fram að næstu réttarhöldum, sem áætluð að verði þann 12. nóvember næstkomandi. Verði hún fundin sek gæti hún átt yfir höfði sér allt að 60 ára í fangelsi.
