Tuttugu og þriggja ára kona hefur verið ákærð fyrir að hafa þóst vera afleysingakennari í grunnskóla vegna þess að henni „leiddist“.
Amy Jones var ákærð fyrir fimm brot sem snúa að því að hafa útsett barn fyrir skaðlegum lýsingum og eitt brot fyrir að hafa gefið sig út fyrir að vera opinber starfsmaður sunnudaginn 4. október. Ákærurnar tengjast atviki sem átti sér stað 24. september, samkvæmt dómsgögnum.
Jones er sögð hafa kannað aðstæður við Rufus King International High School í Milwaukee viku fyrir atvikið. Hún var sjálf nemandi við skólann áður og samkvæmt kæru komst hún fram hjá öryggisvörðum með því að blandast saman við nemendahópinn, að því er Fox 6 greinir frá. Í heimsókninni heyrði hún starfsfólk ræða um fyrirtæki sem útvegaði afleysingakennara.
Þann 24. september voru átta kennarar fjarverandi og sjö afleysingakennarar voru við störf. Jones „var heppin því það vantaði einmitt afleysingakennara í eina stöðu,“ sagði skólastjórinn Doreen Badillo. Jones gaf sig þá út fyrir að vera afleysingakennari og skráði sig inn sem slíkur, samkvæmt Fox 6.
Jones fór síðan inn í kennslustofu sem annar kennari hafði undirbúið. Sá kennari var með henni í um 20 mínútur áður en hann fór.
Eftir að kennarinn fór spurði Jones nemendur hvort einhver þeirra væri með marijúana eða rafsígarettu, samkvæmt kæru málsins. Hún sagði við bekkinn að þetta væri „svo helvíti leiðinlegt og pirrandi“.
Hún er einnig sögð hafa raðað nemendum eftir kynþætti og kyni og notað kynþáttaníð og blótsyrði. Þá hafi hún sagt við einn nemanda að „grjóthalda kjafti“.
Jones er jafnframt sögð hafa gert lítið úr nemendum vegna þyngdar þeirra, kynþáttar, útlits og fjárhagsstöðu. Þá hafi hún montað sig af því að „vera með sakfellingar á sakaskrá og vera alveg sama þótt hún færi í fangelsi,“ samkvæmt kæru málsins.
Ummæli hennar „ollu öllum bekknum óþægindum“ og eftir fyrstu kennslustundina létu nemendur starfsfólk skólans vita. Badillo skólastjóri hafði samband við afleysingakennaraþjónustuna, sem staðfesti að Jones væri ekki starfsmaður hennar, samkvæmt kærunni.
Lögregla kom á skólann og fylgdi Jones út úr húsinu. Hún ræddi við lögreglumenn eftir atvikið og er sögð hafa sagt að hún hefði þóst vera kennarinn vegna þess að henni „leiddist“. Jones sagði einnig að hún hataði börn og hefði einfaldlega viljað „gera eitthvað ruglað“.
Badillo sendi í kjölfarið frá sér yfirlýsingu til nemenda og foreldra skólans þar sem staðfest var að lögreglumenn Milwaukee-lögreglunnar sem starfa sem tengiliðir við skólann og jafnréttisstjóri skólahverfisins hefðu verið látnir vita.
Badillo staðfesti einnig að skólahverfið rannsakaði málið sjálfstætt, samhliða rannsókn lögreglunnar í Milwaukee.
Jones mætti fyrir dómstól 6. október. Næst þar hún að mæta fyrir dómi 20. október þegar frumathugun málsins fer fram.
