Mikil ölvun og ólæti voru á kappleik milli tveggja framhaldsskóla á höfuðborgarsvæðinu í gærkvöldi. Átta lögreglumenn þurftu að vera á vettvangi þegar mest gekk á til að koma skikki á hópinn.
Samkvæmt dagbók lögreglunnar á höfuðborgarsvæðinu fékk einn einstaklingur flösku í höfuðið á meðan á kappleiknum stóð. Áverkar hans reyndust minniháttar.
Mikil ölvun var meðal viðstaddra og kom til óláta milli fylkinga. Blysum var kastað og lentu þau á fólki sem var nærstatt. Þá fengu einhverjir kjaftshögg og aðrir voru hræktir á.
Enginn var vistaður í fangageymslu vegna ólátanna og þegar dagbókin var rituð höfðu engar formlegar kærur verið lagðar fram.
Grunaður um sölu fíkniefna og peningaþvætti
Nokkuð var um önnur verkefni hjá lögreglu í gærkvöldi og nótt. Maður var handtekinn og vistaður í fangageymslu vegna rannsóknar á eignaspjöllum, meintri sölu fíkniefna, vopnalagabroti og peningaþvætti.
Lögreglu og slökkviliði var jafnframt gert viðvart um eld í sameign fjölbýlishúss. Þar hafði kviknað í hlaupahjóli og viðbragðsaðilar fóru á vettvang.
Nokkrir ökumenn komu einnig við sögu lögreglu. Tveir voru kærðir fyrir hraðakstur, annar mældist á 110 kílómetra hraða á klukkustund þar sem hámarkshraði er 80 og hinn á 111 kílómetra hraða við sömu hámarkshraðatakmörkun.
Ökumaður var handtekinn grunaður um akstur undir áhrifum fíkniefna og reyndist auk þess vera með of marga farþega í bifreiðinni.
Annar einstaklingur var vistaður vegna rannsóknar á umferðaróhappi, akstri undir áhrifum fíkniefna og vörslu fíkniefna. Þá voru tveir ökumenn til viðbótar handteknir vegna gruns um akstur undir áhrifum fíkniefna, annar þeirra eftir miðnætti.
