Sverrir Bergmann Magnússon, varaþingmaður Samfylkingarinnar, vakti athygli á notkun tónlistar í pólitískum áróðri á samfélagsmiðlum í ræðu sinni undir liðnum störf þingsins á Alþingi í dag. Hann kallaði eftir því að stjórnmálaflokkar gættu betur að réttindum höfunda og flytjenda þegar tónlist er notuð í kynningarefni.

Sverrir vísaði meðal annars til aðdraganda nýafstaðinnar þjóðaratkvæðagreiðslu og sagði þar hafa mátt heyra tónlist notaða til að styðja pólitísk skilaboð. Hann velti því upp hvort tilskilinna leyfa hefði verið aflað og hvort rætt hefði verið við höfunda og eigendur viðkomandi upptakna.

Hann benti á að samkvæmt leiðbeiningum STEFs væri gerður greinarmunur á réttinum að tónverkinu sjálfu og réttinum að tiltekinni upptöku. Leyfi fyrir öðru fæli því ekki sjálfkrafa í sér leyfi fyrir hinu.

„Að hægt sé að velja lag í snjallsíma staðfestir ekki að nota megi það í kostaðri auglýsingu,“ sagði Sverrir.

Getur gefið til kynna pólitískan stuðning

Sverrir sagði einnig mikilvægt að hafa í huga hvaða skilaboð notkun þekktra laga eða radda flytjenda gæti sent almenningi. Þegar tónlist væri tengd ákveðnum pólitískum málstað gæti skapast sú mynd að listamaðurinn styddi málstaðinn.

„Við eigum að virða það að fólk ráði sjálft hvort og hvernig það tengist pólitískri baráttu,“ sagði hann.

Þingmaðurinn sagði tónlist hafa mikið áhrifavald enda gæti hún vakið tilfinningar, skapað stemningu og aukið kraft pólitískra skilaboða. Á bak við tónlistina lægi hins vegar vinna og sköpun fólks sem ætti rétt á því að réttindi þess væru virt og greitt væri fyrir notkun verka þess.

Hann sagði marga sem störfuðu í skapandi greinum eiga erfitt með að lifa af vinnu sinni þrátt fyrir mikilvægt framlag þeirra til íslenskrar tungu og menningar.

Vill sameiginlegar leiðbeiningar

Sverrir hvatti stjórnmálaflokka og þingmenn til að tryggja að nauðsynleg leyfi væru fyrir hendi áður en kynningarefni með tónlist væri birt. Hann lagði jafnframt til að stjórnmálaflokkarnir mótuðu sameiginlegar leiðbeiningar með STEF og fulltrúum flytjenda og útgefenda um leyfisöflun og greiðslur.

„Við sem setjum öðrum reglur eigum að ganga á undan með góðu fordæmi. Virðing fyrir íslenskri menningu verður að sjást í því hvernig við komum fram við fólkið sem skapar hana,“ sagði Sverrir að lokum.