Söngkonan Guðlaug Sóley Höskuldsdóttir, sem gengur undir listamannanafninu Gugusar, segir frá erfiðri reynslu sinni af listskautum í æsku í myndskeiði sem hún birti á TikTok í gær. Hún lýsir meðal annars miklum útlits- og þyngdarþrýstingi, niðurlægingu og ógnandi framkomu þjálfara þegar hún var barn.
Gugusar segir að þegar hún var tíu ára hafi hún verið vigtuð vikulega og fengið nýtt matarplan ef hún þyngdist. Þá hafi henni verið hótað því að hárið yrði klippt af henni ef hún færi ekki í klippingu, þar sem hárið væri talið of þungt.
Hún segir einnig að þjálfari hafi öskrað á hana ef hún náði ekki að framkvæma ákveðin skautaatriði jafn vel og systir hennar, sem var Íslandsmeistari í greininni.
„Af hverju var ég ekki að skauta eins og hún?“ segir Gugusar að hún hafi verið spurð.
Hún rifjar jafnframt upp atvik þar sem þjálfari rak hana af æfingu. Þegar hún hafði farið af svellinu kom þjálfarinn á eftir henni og skipaði henni að fara út úr höllinni. Hún hafi því þurft að hlaupa út úr skautahöllinni og mátt ekki horfa á æfinguna.
Þá segir hún að einn þjálfarinn hafi síðar verið rekinn eftir að upp komst að hann mætti ölvaður á morgunæfingar.
Hljóp út í strætó af ótta við þjálfara
Gugusar segir að hún hafi heyrt enn verri sögur frá vinkonum sínum sem æfðu einnig skauta og að hún hafi sjálf í raun sloppið betur en margar þeirra.
Hún nefnir meðal annars sögur af þjálfurum sem hafi átt í kynferðislegum samskiptum við eða reynt við mæður þeirra sem æfðu. Þá hafi líkamleg refsing verið viðhöfð.
„Ef maður strekkti ekki nógu vel þá var maður rassskelltur. Karlaþjálfarar að rasskella mig. Og við erum að tala um að ég er barn,“ segir hún.
Hún lýsir því einnig að henni hafi verið klipið og hótað. Eitt sinn hafi hún orðið svo hrædd við þjálfara að hún ákvað í miðri æfingu að hlaupa út, stökkva upp í strætó og taka hann heim.
Þegar hún var fimmtán ára fór hún í æfingaferð til Rússlands án þess að nokkurt foreldi fylgdi. Þar hafi þjálfararnir lagt hana í einelti einn daginn og hún grátið hástöfum. Hún segir þó að iðkendum hafi ekki þótt í boði að sýna vanlíðan eða gráta.
Mikill þrýstingur á mataræði og útlit
Í myndskeiðinu segir Gugusar að strangar reglur hafi gilt um mataræði iðkendanna. Þeim hafi meðal annars verið bannað að borða pasta, kökur og ýmislegt annað. Á sama tíma hafi verið litið á átröskun sem tabú.
„Það var ekki eins og við værum að æfa fyrir Ólympíuleikana“.
Í texta sem hún birti með myndskeiðinu setur hún reynsluna í samhengi við spurningu sem margir foreldrar velti fyrir sér: Hvort þeir eigi að setja barn sitt í tiltekna íþrótt.
Hún segir mikilvægt að foreldrar spyrji sig hvers vegna barnið vilji æfa íþróttina, hvort það hafi sjálft áhuga og hvort það hafi gaman af æfingunum. Einnig þurfi að skoða kostnaðinn, bæði fjárhagslegan og þann tíma sem íþróttin krefst af fjölskyldunni.
Gugusar nefnir að íþróttir geti haft margvíslegan ávinning, meðal annars fyrir líkamlega heilsu, félagsfærni, sjálfstraust og skipulag. Á móti geti fylgt áhætta ef þjálfunin er of harkaleg eða óstöðluð, ef vantraust ríkir á milli þjálfara og iðkenda eða ef of mikill þrýstingur er á árangur.
Hún hvetur foreldra til að fylgjast með líðan barna sinna, spyrja hvort þau hafi gaman af æfingunum og hvort þau vilji halda áfram. Þá sé mikilvægt að endurmeta ákvörðunina reglulega, enda geti áhugi barna breyst.
„Ef einhver rauð flögg koma fram (óviðeigandi framkoma, of mikill þrýstingur eða óörugg umgjörð) þá er rétt að stíga til baka,“ skrifar hún.
Að lokum býður hún fólki að senda sér spurningar um hvernig ræða megi íþróttaiðkun við börn og hvernig best sé að nálgast þátttöku þeirra í íþróttum.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
































Athugasemdir