Sjálfvirkt brunavarnakerfi á skíðasvæði í Kína fór heldur betur fram úr sér þegar það túlkaði mynd af logum á stafrænu skilti sem raunverulegan eld og sprautaði vatni yfir heilan matsöluskála.
Atvikið átti sér stað 19. nóvember á Wanlong-skíðasvæðinu í Zhangjiakou. Myndskeið af atvikinu hefur farið eins og eldur í sinu á samfélagsmiðlum og sýnir hvernig vatnsbuna úr slökkvikerfinu skellur á skiltinu og bleytir allt í kring.
Kerfið notar gervigreind og myndavélar til að greina eld og bregðast hratt við. Að þessu sinni virðist það hins vegar hafa ruglast á hreyfimynd af logum á skiltinu og raunverulegum bruna.
Enginn slasaðist en loka þurfti matsöluskálanum tímabundið vegna vatnstjóns.
Síðar komu fram upplýsingar um að hiti frá kolagrilli fyrir aftan skiltið gæti hafa komið kerfinu af stað, en vatnsbunan beinst að skiltinu vegna staðsetningar þess.
Atvikið hefur vakið athygli á veikleikum sjálfvirkra brunavarnakerfa og mikilvægi þess að þau styðjist við fleiri en eina aðferð til að greina eld.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
































Athugasemdir