Fimm erlendir ríkisborgarar hafa verið ákærðir í þremur aðskildum málum fyrir peningaþvætti eftir að lögregla lagði hald á háar fjárhæðir í reiðufé í Flugstöð Leifs Eiríkssonar. Um er að ræða fjóra litháíska ríkisborgara og einn marokkóskan ríkisborgara.
Í fyrsta málinu eru tveir litháískir karlmenn ákærðir fyrir að hafa í félagi tekið við samtals 10.755 evrum og 21 þúsund krónum í reiðufé frá óþekktum aðila eða aðilum. Samkvæmt ákæru gat þeim ekki dulist að peningarnir væru ávinningur af refsiverðum brotum.
Mennirnir voru handteknir í Flugstöð Leifs Eiríkssonar 5. október 2025 þegar þeir voru á leið til Alicante á Spáni. Annar þeirra var með 5.650 evrur og 21 þúsund krónur faldar í farangri sínum en hinn með 5.105 evrur. Saksóknari krefst þess að fjármunirnir verði gerðir upptækir.
Í öðru málinu er marokkóskur karlmaður ákærður fyrir peningaþvætti vegna 608.250 danskra króna sem fundust í farangurstösku hans og veski. Hann var handtekinn við komuna til Keflavíkur frá Nuuk á Grænlandi 5. ágúst 2025 og hugðist halda áfram til Kaupmannahafnar. Samkvæmt ákæru hafði hann tekið við peningunum á Grænlandi frá óþekktum aðila eða aðilum.
Þriðja málið varðar tvær litháískar konur sem eru ákærðar fyrir að hafa tekið við samtals 9.000 evrum. Þær voru handteknar í Flugstöð Leifs Eiríkssonar 26. janúar síðastliðinn þegar þær voru á leið til Varsjár í Póllandi. Önnur var með 4.600 evrur faldar í farangri sínum og hin 4.400 evrur.
Í öllum málunum er þess krafist að ákærðu verði dæmd til refsingar og greiðslu sakarkostnaðar. Þá krefst ákæruvaldið upptöku alls þess reiðufjár sem lögregla lagði hald á.
Í heildina eru þetta tæpar 15 milljónir króna.
