Umboðsmaður Alþingis hefur lokið máli sem varðaði tengsl fastrar búsetu hér á landi og rétt handhafa erlendra ökuskírteina til aksturs. Málinu lauk með bréfi 28. september síðastliðinn og var niðurstaðan birt á vef umboðsmanns í byrjun október.
Tilefni kvörtunarinnar var mál tengdasonar þess sem kvartaði, en hann kemur frá ríki utan Evrópska efnahagssvæðisins og hafði nýlega verið sakfelldur í héraðsdómi fyrir að aka án gildra ökuréttinda. Samkvæmt upplýsingum í málinu hafði dóminum verið áfrýjað til Landsréttar.
Í kvörtuninni voru meðal annars gerðar athugasemdir við framkvæmd og upplýsingagjöf sýslumanns og Þjóðskrár Íslands um það hvenær einstaklingur telst hafa fasta búsetu hér á landi í tengslum við skipti á erlendu ökuskírteini fyrir íslenskt. Laut ágreiningurinn meðal annars að því hvort miða ætti við komudag til landsins eða þann dag sem lögheimili er skráð hér.
Umboðsmaður taldi sér ekki fært að fjalla um þau atriði sem tengdust dómsmáli tengdasonarins þar sem málið væri komið til dómstóla og ætla mætti að sambærileg álitaefni kæmu til úrlausnar fyrir Landsrétti. Starfssvið umboðsmanns tekur ekki til starfa dómstóla.
Þá taldi umboðsmaður ekki skilyrði til að taka almennar athugasemdir um upplýsingagjöf stjórnvalda til frekari meðferðar. Kvörtun þarf almennt að varða tiltekna ákvörðun, athöfn eða athafnaleysi stjórnvalds sem hefur bein áhrif á hagsmuni þess sem kvartar.
Umboðsmaður benti jafnframt á að það væri ekki hlutverk embættisins að veita almennar lögfræðilegar álitsgerðir eða svara almennum lögspurningum að beiðni einstaklinga.
