Landsréttur hefur staðfest sextán ára fangelsisdóm yfir Margréti Höllu Hansdóttur Löf fyrir að hafa orðið föður sínum að bana og ráðist með stórfelldu og sérstaklega hættulegu ofbeldi á móður sína.

Vísir greinir frá málinu.

Atvikið átti sér stað á heimili fjölskyldunnar við Súlunes á Arnarnesinu í Garðabæ 11. apríl 2025. Héraðsdómur dæmdi Margréti Höllu í sextán ára fangelsi í desember síðastliðnum. Ekki þótti sannað að hún hefði ætlað sér að ráða móður sína af dögum og var hún því sýknuð af ákæru um tilraun til manndráps gagnvart henni.

Ríkissaksóknari hafði krafist þess að refsingin yrði þyngd í sautján ára fangelsi.

Þá var kröfu hálfbróður Margrétar Höllu um að hún yrði gerð arflaus eftir föður þeirra vísað frá dómi.