Guðmundur Birkir Pálsson, sem flestir þekkja sem Gumma Kíró, opnar sig í einlægu viðtal við í Heimilisblaðinu sem birtist í síðustu viku. Ræðir Guðmundur meðal annars hvernig hann kynntist Línu Birgittu, unnustu sinni, og skilnað sinn við fyrrverandi eiginkonu sína.

Í viðtalinu talar Guðmundur um einnig æsku sína en hann bjó meðal annars í Bolungarvík, á Selfossi, í Reykjavík og Danmörku á sínum yngri árum. Hann segir í viðtalinu að hann hafi snemma fengið áhuga á tísku.

„Sem unglingur hafði ég þörf fyrir að líta vel út, vera vel til fara og vinsæll. Það var mér mikilvægt að fólki líkaði vel við mig,“ sagði hnykkjarinn knái. Hann hafi fengið sitt fyrsta húðflúr 16 ára gamall og húðflúrin séu hluti af ímyndinni.

„Maður er að fegra líkamann með einhverju sem manni finnst vera fallegt eða passa vel við líkamann. Þetta er einhver þörf fyrir að skreyta líkamann. Þótt ég hafi gengið í gegnum erfið tímabil sem unglingur, ungur maður og seinni tíð þá hef ég samt alltaf haft metnað fyrir velgengni. Þess vegna hef ég aldrei leiðst út í neinar hremmingar. En ég prufaði ýmislegt sem ungur maður.“

Í viðtalinu greinir hann frá því að hann hafi ekki verið öruggur með sjálfan sig á unglingsárunum. „Ég var alltaf að sækjast eftir athygli og samþykki annarra. Árin frá því að ég var 16 ára og fram að tvítugu voru mjög andlega krefjandi. Það var ekki beint þunglyndi, en ég myndi segja vanlíðan.“