Lögregla Spánar hefur upprætt skipulagða glæpastarfsemi sem stóð að kynlífsþrælkun á suðurhluta Tenerife. Alls var 27 konum bjargað, þar á meðal nokkrum undir 18 ára aldri, og voru 14 einstaklingar handteknir, þar á meðal tveir sem taldir eru leiðtogar hópsins.

Rannsókn málsins hófst í júlí 2024 eftir að deild lögreglu, sem sinnir stuðningi við fórnarlömb mansals, barst tölvupóstur með ábendingu um málið.

Samkvæmt niðurstöðum rannsóknarinnar ferðuðust leiðtogar glæpasamtakanna reglulega til nokkurra landa í Suður-Ameríku, þar sem þeir beindu sjónum sínum að ungum konum sem bjuggu við mikla fátækt. Þeim var lofað atvinnu og betra lífi en við komu til Spánar tók við kynferðisleg misnotkun.

Konurnar voru látnar taka á sig skuldir sem gátu numið allt að 3.000 evrum og var þeim gert að greiða þær með því að veita kynlífsþjónustu. Þær voru hýstar í litlu húsnæði með öðrum fórnarlömbum og sættu ströngum reglum og stöðugu eftirliti.

Þótt konurnar hefðu samþykkt að ferðast til Spánar í þeirri trú að þær myndu starfa sem dansarar á nektarklúbbum, kom fljótt í ljós að raunveruleikinn var annar þegar inn í klúbbana var komið. Lögregla segir að þær hafi verið neyddar til að vinna langan vinnudag, beittar þrýstingi til að neyta fíkniefna og í sumum tilvikum verið byrluð lyf án vitundar til að draga úr hömlum þeirra.

Við rannsóknina fundust jafnframt vísbendingar um kynferðislega misnotkun barna á skemmtistöðunum. Þar fannst meðal annars 16 ára stúlka með fölsuð skilríki.

Málið er enn til rannsóknar að sögn lögreglu.