Hinn goðsagnakenndi tónlistarmaður Sir Rod Stewart kann svo sannarlega að skemmta sér á tónleikaferðalögum, eins og sjá má á myndbandi þar sem hann var leiddur út í bíl af þremur lífvörðum. Rod, sem er 80 ára, virtist vera heldur óstöðugur á fótum eftir fjöruga kvöldstund í Kraká í Póllandi – og hann virðist ekki ætla að hægja á sér þrátt fyrir aldurinn.

Sagt er að hann hafi eytt um fimm klukkustundum á barnum eftir að hafa horft á tap Arsenal gegn PSG á írsku ölstofunni Ronnie Drew's. Sir Rod var í kringum aðra Breta sem hann skemmti sér með langt fram á nótt, líkt og hann var vanur á sínum yngri árum.

Söngvarinn, sem gerði meðal annars lagið Maggie May frægt, yfirgaf barinn klukkan eitt að nóttu til, en þurfti þá aðstoð við að komast öruggur aftur heim. Þrír lífverðir stóðu honum við hlið þegar hann yfirgaf staðinn og hjálpuðu honum inn í bílinn.

„Rod er kannski orðinn áttræður en hann getur enn skemmt sér eins og tvítugur,“ sagði heimildarmaður. „Þegar hann fór þurfti að styðja hann og hann var svolítið óstöðugur.“

Gestirnir á barnum tóku honum fagnandi og kölluðu hvatningarorð á eftir honum. Eitt vitnið sagði að einhver hefði hrópað: „Hvar er Penny?“ þegar Rod settist inn í bílinn.

Rod er í Póllandi sem hluti af One Last Time tónleikaferðalaginu sínu og hyggst koma fram á Glastonbury-hátíðinni í næsta mánuði. Kona hans, Penny Lancaster, hefur fylgt honum á ferðalaginu og stutt hann af krafti.

Í síðasta mánuði var Penny með honum í Kaupmannahöfn þar sem þau tóku rómantíska mynd saman, bæði í samræmdum fatnaði. Þau nutu heimilislegra þæginda á fimm stjörnu hótelinu Hotel d'Angleterre í dönsku höfuðborginni, þar sem þau sátu saman með drykki í fallegu umhverfi og héldust í hendur.

Sir Rod klæddist ljósri prjónapeysu og gráum buxum ásamt hvítum strigaskóm og silfurarmbandi, en Penny klæddist skyrtu í samskonar lit og lét hárið falla niður.

Rod er nú á sjö mánaða tónleikaferð um Evrópu, Norður-Ameríku og Suður-Ameríku. Hann mun stíga á svið á Glastonbury í júní en hefur viðurkennt að það kosti hann gríðarlegar fjárhæðir að koma fram þar.

Í viðtali við TALKSport í nóvember sagði hann: „Það er mikill heiður.“ Hann bætti við: „Þetta mun kosta mig 300 þúsund dollara – um 236 þúsund pund (um 41 milljón krónur). Ég þarf að flytja allt bandið mitt frá Ameríku og Glastonbury borgar það ekki. En mér er alveg sama þó þetta kosti mig eina milljón dollara – ég hefði samt gert það. Þetta er mikill, mikill heiður.“

Hér má sjá hinn áttræða töffara á tónleikum í Kraká þann 8. maí síðast liðinn.