Jóhann Helgi Hlöðversson segir tímabært að endurskoða stöðu hrafnsins á Íslandi og afturkalla þá heimild sem gerir kleift að veiða fuglinn allt árið. Þetta kemur fram í Facebook-færslu sem hann birti í kjölfar mikillar athygli sem hrafninn Dimma hefur vakið en hún hefur nú verið týnd í nokkrar vikur.

Jóhann segir viðbrögð landsmanna hafa komið sér á óvart og að fuglinn hafi greinilega unnið sér sess í hjörtum margra.

„Margar vísbendingar berast daglega um Dimmu. Hún virðist eiga hjarta þjóðarinnar og njóta ótrúlegrar samúðar. Ég er hrærður yfir þessum mikla og sívaxandi áhuga landsmanna á hrafninum, því slíkt er alls ekki sjálfgefið.“

Hann bendir á að samkvæmt gildandi reglum sé hrafn réttdræpur allt árið hér á landi, þótt allir villtir fuglar séu almennt friðaðir.

Í færslunni lýsir Jóhann hrafninum sem einstaklega greindum fugli og telur að neikvætt viðhorf til hans eigi sér litla stoð.

„Hrafninn er stórmerkilegur fugl og telst til greindustu dýrategunda heims. Hann er úrræðagóður, útsjónarsamur og einstaklega fær um að bjarga sér. Kannski er það einmitt þess vegna sem honum hefur stundum verið mætt með tortryggni og jafnvel hatri.“

Jóhann segir hrafna mynda sterk fjölskyldutengsl og sýna hegðun sem bendi til flókins tilfinningalífs. Hann telur því eðlilegt að endurskoða lagalega stöðu fuglsins.

„Er ekki orðið tímabært að endurskoða stöðu hrafnsins, setja hann í flokk með öðrum íslenskum fuglum og afturkalla þessa takmarkalausu veiðiheimild?“

Að lokum bendir hann á að hrafninn sé ekki aðeins mikilvægur hluti íslenskrar náttúru heldur einnig menningararfs þjóðarinnar.

„Kannski er kominn tími til að við horfum á hrafninn öðrum augum — ekki sem óvin, heldur sem einn merkilegasta fugl Íslands.“

Með færslunni birti Jóhann Hrafn myndskeið þar sem hann talar um þær vísbendingar sem hann hefur fengið um það hvar Dimma gæti haldið sér.