Belgískur maður lést eftir að hafa fallið af svölum hótels í Puerto de la Cruz, sem er í norðurhluta Tenerife, þegar eldur braust út á hótelinu fyrir rúmri viku. Neyðarástandið hófst þegar eldur kviknaði í einu af hótelherbergjunum, sem leiddi til rýmingar alls hótelsins.

Slökkvilið, sjúkralið og ­lögregla mætti á vettvang á sama tíma og þykkur reykur fyllti hluta byggingarinnar. Gestum var komið í öruggt skjól á meðan slökkviliðsmenn börðust við að ná tökum á eldinum.

Við rýminguna fundu lögreglumenn lík ungs manns sem hafði fallið af svölum. Rannsókn leiddi síðar í ljós að hann hafði dvalið í herberginu þar sem eldurinn kviknaði.

Lögreglan vinnur nú með þá kenningu að maðurinn hafi hugsanlega kveikt eldinn viljandi áður en hann féll af svölunum. Maðurinn var 23 ára gamall að sögn lögreglu en ekki hefur verið greint frá því á hvaða hæð maðurinn dvaldi.

Slökkviliðið náði fljótt að ráða niðurlögum eldsins og engin önnur meiðsli voru tilkynnt. Lögreglan heldur áfram að rannsaka atvik málsins að svo stöddu.