Sveinn Andri Sveinsson lögmaður gagnrýnir stjórnvöld í Ísrael harðlega í Facebook-færslu sem hann birti í gær og segir meðferð á Palestínumönnum minna á ofsóknir nasista gegn gyðingum á sínum tíma.

Í færslunni gagnrýnir hann einnig íslenska stjórnmálaflokka sem hafi stutt Ísrael í umræðunni.

„Kristalnótt allar nætur.
Sjálfstæðisflokkurinn og Miðflokkurinn hampa mjög stjórnvöldum í Israel sem eina lýðræðrisríkinu í Miðausturlöndum og að ekki megi gagnrýna það,“ skrifar hann.

Sveinn Andri vísar til máls sem kom upp nýlega innan ísraelska hersins, þar sem háttsettur kvenkyns yfirmaður lak myndbandi sem sýnir hermenn nauðga palestínskum fanga á hrottafenginn hátt.

„Til að gera langa sögu stutta, þá hefur herforinginn sem upplýsti um brotið verið rekin úr hernum með skömm, en sakir hafa verið felldar niður á hermennina, þrátt fyrir að þær teldust sannaðar,“ skrifar hann.

Að hans sögn endurspegli málið hvernig kerfið starfi gagnvart Palestínumönnum.

„Svona virkar Israel í dag; engin lög og engar stofnanir eru til staðar í landinu sem verja líf og limi Palestíumanna, eða réttindi þeirra; þeir eru réttlaus þjóð í eigin landi.“

Hann segir að aðferðir ísraelskra stjórnvalda, hersins og landtökumanna veki óhugnanlegar sögulegar samlíkingar.

„Aðferðir ísraelskra stjórnvalda, hersins og landtökufólks minna óhuggulega mikið á ofsóknir þýzkra nasista á hendur gyðingum,“ skrifar Sveinn Andri Sveinsson í færslunni.