Falleg og vel skipulögð fjögurra herbergja íbúð á fyrsta hæð við Sólvallagötu 29 í Vesturbæ Reykjavíkur er komin á sölu. Um er að ræða 113,4 fermetra eign í húsi sem reist var árið 1927 og er staðsett á einum eftirsóttasta stað borgarinnar, skammt frá miðbænum.
Það eru þau Ari Birgir Ágústsson og Ásbjörg Einarsdóttir sem eru að selja íbúðina en Ari hefur starfað sem listrænn stjórnandi við kvikmyndir á borð við Snertingu og Godland og þáttaraðirnar Ráðherrann og Ófærð
Íbúðin er björt og rúmgóð með góðri lofthæð sem setur svip sinn á eignina. Skipulag hennar samanstendur af holi, eldhúsi, tveimur samliggjandi stofum sem nýtast sem stofa og borðstofa, tveimur stórum svefnherbergjum, baðherbergi og geymslu. Frá íbúðinni eru suðursvalir með stiga niður í garð sem veita eigninni aukið notagildi og notalegt útisvæði.
Eignin er staðsett í gamla Vesturbænum þar sem stutt er í þjónustu, skóla, verslanir, kaffihús og útivistarsvæði. Slík staðsetning hefur notið mikilla vinsælda meðal kaupenda undanfarin ár.
Ásett verð eignarinnar er 97,9 milljónir króna.
