Lögreglan á Spáni hefur staðfest að lík ungs bandarísks ferðamanns sem sogaðist út í sjó á sunnudag á suðurhluta Lanzarote hafi fundist. Sérhæfðir kafarar úr neðansjávarsveit GEAS fundu líkið í gær, þriðjudag, um 20 metrum frá þeim stað þar sem slysið varð.

Fórnarlambið var einn af fjórum bandarískum námsmönnum sem staddir voru á svæðinu Los Charcones. Þau voru á aldrinum 19 til 21 árs og höfðu komið frá Madríd. Hópurinn varð fyrir öflugri öldu; þrír þeirra lifðu slysið af með aðstoð viðbragðsaðila en sá fjórði, sem átti stutt í 21 árs afmælið sitt, dróst niður í sjóinn.

Leit hafði staðið yfir frá sunnudegi með miklum viðbúnaði. Þar komu meðal annars að björgunarbátar sjóbjörgunar, þyrla frá neyðarhópi Kanaríeyja (GES), tvær köfunarsveitir GEAS, slökkvilið með sjófarartæki og lögreglan í Yaiza, sem beitti dróna með hitamyndavél.

Hópurinn hafði gengið að Los Charcones þrátt fyrir lokaðan veg sem var merktur með hindrun. Þegar slysið varð var í gildi veðurviðvörun vegna hættulegra aðstæðna við ströndina á Kanaríeyjum, þar sem spáð var ölduhæð yfir fimm metrum við Lanzarote og Fuerteventura. Sund var stranglega bannað á svæðinu vegna aðstæðna.

Tveir þeirra sem lifðu slysið af sátu eftir á klettum með minniháttar meiðsli og afþökkuðu læknisaðstoð. Þeim þriðja var bjargað um 800 metra frá landi með þyrlu.

Los Charcones er þekkt fyrir náttúrulaugar sínar og nýtur mikilla vinsælda á samfélagsmiðlum, en viðbragðsaðilar vara við því að strandlengjan geti verið afar hættuleg, sérstaklega þegar viðvaranir vegna mikils öldugangs eru í gildi.