Lögreglan á höfuðborgarsvæðinu hafði nóg að gera í nótt og var kölluð er í slatta af útköllum, meðal annars vegna gruns um akstur undir áhrifum áfengis eða fíkniefna, þjófnaðarmála og minniháttar umferðarslyss.

Þrír ökumenn voru stöðvaðir í akstri grunaðir um akstur undir áhrifum fíkniefna eða áfengis. Þeir voru allir látnir lausir að lokinni sýnatöku. Síðar var annar ökumaður stöðvaður grunaður um akstur undir áhrifum fíkniefna og kom þá einnig í ljós að ökuréttindi hans voru útrunnin. Hann var einnig látinn laus að lokinni sýnatöku.

Tilkynnt var um þjófnað í miðbænum þar sem aðili var handtekinn. Áður höfðu borist tilkynningar um sama mann vegna þjófnaðar, auk þess sem hann var sagður í annarlegu ástandi. Maðurinn var vistaður í fangaklefa þar til hægt væri að taka af honum skýrslu vegna málsins. Þá var einnig óskað eftir aðstoð lögreglu vegna þjófnaðar í verslun, en málið var leyst með vettvangsskýrslu.

Lögregla var jafnframt kölluð til vegna umferðarslyss, en við nánari athugun reyndist um minniháttar óhapp að ræða og engin slys urðu á fólki.

Einnig barst tilkynning um meðvitundarlausan mann í hverfi í umdæminu. Þegar lögregla kom á vettvang kom í ljós að maðurinn var sofandi. Þar sem hann hafði ekki í nein hús að venda var honum boðin gisting í fangageymslu lögreglu.

Auk þessa voru þrír ökumenn sektaðir fyrir of hraðan akstur.