Lögreglan á höfuðborgarsvæðinu telur að óprúttinn aðili eða aðilar hafi staðið að því að hleypa hundruðum minka úr minkabúinu Dalsbúi í Mosfellsdal snemma í morgun. Nú er leitað vitna og myndefnis sem gæti varpað ljósi á málið.

Í tilkynningu frá lögreglu kemur fram að rannsóknin beinist að mannaferðum í Mosfellsdal frá miðnætti og þar til tilkynning um strok minkanna barst laust eftir klukkan sjö í morgun.

Lögreglan telur líklegt að sá eða þeir sem stóðu að verknaðinum hafi verið á ferð á bifreið og lagt henni einhvers staðar á svæðinu áður en minkunum var sleppt.

Því er sérstaklega óskað eftir því að þeir sem kunna að hafa upptökur úr ökutækjamyndavélum eða öryggismyndavélum á svæðinu fari yfir myndefni sitt. Lögreglan nefnir meðal annars Þingvallaveg, Hlaðgerðarkotsveg, Reykjahlíðarveg, Æsustaðaveg, Æsustaðaland, Hraðastaðaveg, Helgadalsveg og Dalsbúsveg sem svæði sem rannsóknin nær til.

Þeir sem kunna að búa yfir upplýsingum eða myndefni eru beðnir um að senda það á netfangið [email protected], ásamt nafni og símanúmeri, eða hafa samband við lögreglu í síma 444-1000.

Fyrr í dag kom fram að nokkur hundruð minkar hefðu sloppið úr Dalsbúi og að skotvopnum yrði beitt við að fanga dýrin. Rannsókn lögreglu bendir nú til þess að um refsiverðan verknað kunni að hafa verið að ræða.