Kona, búsett í Reykjavík, hefur stefnt eiginmanni sínum til að fá lögskilnað og vill hún fá fullt forræði yfir dóttur þeirra hjóna.

Í stefnunni stendur að konan hafi ítrekað flutt burt af heimili þeirra og hafi núna ekki búið saman með eiginmanni sínum í yfir eitt og hálft ár. Ástæða þess er að eiginmaðurinn er „þræll fíknidjöfulsins“ samkvæmt stefnunni og fer alltaf aftur og aftur í sama sporið, hann fer í meðferð og skömmu síðar fellur hann aftur í fíknipottinn. Hann hefur farið í á fimmta tug meðferða en er enn háður fíknidjöflinum. Konan getur ekki verið nálægt honum þegar hann er kominn í neyslu og það hafi skelfileg áhrif á dóttur þeirra. Jafnframt hafi það skelfileg áhrif á dóttur þeirra eftir að hún hefur umgengist föður sinn. Hún verði pirruð og reið.

Eiginmaðurinn hefur ekki beint lagt hendur á hana en beitir hana sína miklu andlegu ofbeldi þegar hann er í neyslu og þegar hann er nýkominn úr neyslutúrum sínum að sögn hennar. Þetta ofbeldi er það mikið að hún getur ekki verið í návígi við hann.

Þá hefur, samkvæmt stefnunni, ekki spurst til eiginmannsins frá 18. ágúst 2025, þegar hann sást síðast, skólaus, símlaus og auralaus á bensínstöð í Búlgaríu, eftir að honum hafði verið sleppt úr haldi lögreglu þar í landi. Kærasta hans sem var með honum í Búlgaríu á umræddum tíma hefur ekkert náð sambandi við hann og er komin heim og fór til lögreglunnar á höfuðborgarsvæðinu til skýrslutöku. Lögreglan er að kalla eftir gögnum frá Búlgaríu. Allir telja að meiri líkur en minni séu á því að eiginmaðurinn sé fremur liðinn en lífs. Eiginkonan hefur reynt að fá leiðréttingu hjá Skattinum þar sem allar barnabætur hafa farið til eiginmannsins en ekki til hennar.