Brynja Ýr Baugsdóttir, sem birti frásagnir á TikTok af ofbeldi sem 18 ára sonur hennar varð fyrir í nánu sambandi, stígur fram í viðtali við Vísi um helgina og segir alla söguna af margs konar ofbeldi af hendi kærustunnar.

Kærastan hafi meðal annars slegið hann ítrekað meðan hann keyrði bíl, hótað að svipta sig lífi og síðan bætt í ofbeldishegðunina.

Stúlkan hafi síðan keyrt bíl sonar hennar próflaus og klesst hann. Þá hafi foreldrar stúlkunnar varað Brynju við sambandinu.

Í desember kærðu þau stúlkuna fyrir líkamsárás.

„Það gerðist eftir að sonur minn kom heim einn daginn með glóðarauga og ég fór með hann til læknis til að fá áverkavottorð,“ segir hún við Vísi.

Brynja segir að fyrrverandi kærastan hafi haldið áfram að áreita son hennar og nýja kærustu hans. Þá hafi hún hótaði henni, beðið son hennar að drepa sig, hótað nýju kærustunni lífláti og svo framvegis, undir eigin aðgangi og öðrum aðgöngum á samfélagsmiðlum.

„Ég ætla svo mikið að eyðileggja líf ykkar,“ sagði stúlkan við Brynju, samkvæmt skilaboðum sem hún birtir á TikTok.

„Svaraðu mér annars verður vesen fyrir þig kona,“ segir stúlkan síðan öðrum í skilaboðum. Þá segist hún aldrei ætla að hætta.

Drengurinn hefur sótt sér sálfræðiaðstoð eftir reynsluna, er hræddur og líður eins og hann þurfi alltaf að vera vakandi.

Í umfjöllun Vísis kemur fram að 29 prósent drengja sem höfðu verið í sambandi á unglingsárunum hefðu orðið fyrir einhvers konar ofbeldi í sambandinu, en 41 prósent stúlkna.

Þá sýni rannsóknir að drengir segi síður frá ofbeldinu.