Formaður Miðflokksins, Sigmundur Davíð Gunnlaugsson, greindi frá því á samfélagsmiðlum í dag að hvolpur væri kominn inn á heimili fjölskyldunnar. Færslan vakti athygli þar sem Sigmundur Davíð fór óvenju persónulegum orðum um rólegt kvöld heima eftir annasaman tíma í stjórnmálunum.
„Ég er yfirleitt feiminn við að vera á persónulegu nótunum en einstaka sinnum koma dagar sem þróast þannig að það verður freistandi að segja frá því,“ skrifaði hann í upphafi færslunnar.
Sigmundur Davíð sagði síðustu vikur hafa einkennst af miklum hamagangi vegna sveitarstjórnarkosninga og umræðu um umsókn Íslands að Evrópusambandinu. Eftir að hafa lokið síðustu skyldum tengdum þeirri „orrahríð“ hafi hann haldið heim á leið þar sem nýr heimilisvinur beið hans.
„Heima beið hvolpur sem ég gæti alveg vanist,“ skrifaði hann og viðurkenndi jafnframt að hann hefði áður haft „smávægilegar efasemdir“ áður en hundurinn mætti á heimilið.
Kvöldið hélt áfram með fjölskyldustund þar sem lambalund og kartöflur voru á matseðlinum. Þá fékk dóttir Sigmundar Davíðs að velja sjónvarpsefni kvöldsins. Upphaflega hafi staðið til að horfa á kvikmyndina The Hobbit, en þegar hún reyndist ekki aðgengileg hafi hún lagt til að þau byrjuðu að horfa á hina vinsælu sjónvarpsþætti The Sopranos frá byrjun.
