„Víglundur var vinur allra“

Fimmtudagskvöldið 26. júní næstkomandi verða haldnir tónleikar til styrktar fjölskyldu Víglundar Þorsteinssonar frá Haukholtum, sem lést af slysförum þann 28. maí síðastliðinn.

Tónleikarnir fara fram í félagsheimilinu á Flúðum og eru þeir hugsaðir fyrir alla fjölskylduna en þó eru vissulega allir velkomnir.

„Svona atburður snertir alla í hreppnum, alla í uppsveitunum og örugglega alla landsmenn. Víglundur var einstaklega stór persónuleiki og fór mikið fyrir honum og þeim bræðrum hvar sem þeir komu. Víglundur var vinur allra og alltaf hress og kátur. Samfélög eins og þetta eru náin og alla langar að gera eitthvað í svona aðstæðum en við erum um leið svo vanmáttug. Fjölskyldan í Haukholtum er öllum góð og svarið „já“ var alltaf fyrst í einu og öllu,“ segir Bessi Theodórsson sem er skipuleggjandi tónleikanna ásamt ásamt Ragnheiði Hallgrímsdóttur á Sólheimum, í samtali við sunnlenska.is.

„Ragnheiður hafði samband við mig og viðraði þessa hugmynd sem ég tók vel í og eftir það samtal hefur kjarnorkuverið Ragnheiður verið á fullu við undirbúning nánast í svefni og vöku,“ segir Bessi.

Bessi segir að það hafi gengið vel að fá listamenn til að koma fram á tónleikunum, tekur fram að allir þeir sem koma að tónleikunum gefa vinnuna sína:

„Tónleikarnir hefjast snemma, við opnum húsið 18:00 og öll fjölskyldan kemur saman. Við erum með viðmiðunarverð á miðum en hver gestur fær athygli, alltaf í boði að borga meira en ef það koma stórar fjölskyldur saman finnum við bara eitthvað sanngjarnt. Það eiga allir að geta komið og notið. Við hugsum minna um miðaverðið. Svo verðum við með létta veitingasölu og Pizzavagninn mætir, svo það þarf ekki að hugsa fyrir kvöldmatnum. Tónleikarnir munu standa til um það bil 23:00,“ segir Bessi og bætir þessu við að lokum:

„Kvenfélag Hrunamannahrepps hefur haldið utan um söfnun og aðstoð við fjölskylduna. Sá sjóður er og verður opinn fyrir framlög og þeim sem vilja og tök hafa, en komast ekki á tónleikana, er bent á bankareikninginn 0325-22-001401, kennitala, 700169-7239. Annars eru öll hvött til að koma og njóta á fallegu kvöldi fyrir alla fjölskylduna. Væntanlega verða bros, tár, hlátur og faðmlög allt í bland.“