Fjölmiðlafélagið Sýn, sem rekur meðal annars Vísi.is, Stöð 2 og Bylgjuna, hefur tilkynnt Kauphöllinni um að nýr stjórnarmaður bætist við fimm manna stjórn félagsins á föstudag. Nýi stjórnarmaðurinn, Heiðrún Lind Marteinsdóttir, gegnir um leið því hlutverki að vera í hagsmunagæslu fyrir íslensk sjávarútvegsfyrirtæki, sem framkvæmdastjóri Samtaka fyrirtækja í sjávarútvegi.

Fjórir af tíu stærstu hluthöfum Sýnar eru lífeyrissjóðir, en sömuleiðis eru stóru viðskiptabankarnir þrír allir meðal 15 stærstu hluthafa.

Þrátt fyrir að hagsmunagæsluaðili sjávarútvegsins sé í stjórn Sýnar er ekki þar með sagt að viðkomandi geti haft áhrif á umfjallanir fjölmiðla félagsins. Ritstjóri fréttastofu Sýnar, Erla Björg Gunnarsdóttir, heyrir hins vegar beint undir forstjóra Sýnar, Herdísi Dröfn Fjeldsted, sem er ráðin af stjórn félagsins.

Ekki mun þurfa að kjósa um stjórn félagsins, þar sem aðeins fimm frambjóðendur eru til stjórnar. Sömuleiðis fengust ekki þrjú framboð í tilnefningarnefnd stjórnar.

Gengi Sýnar í Kauphöllinni hefur fallið um 47% síðasta árið og um 31% á yfirstandandi ári.

Sýn sendi frá sér afkomuviðvörun 10. febrúar síðastliðinn vegna versnandi horfa.