Rithöfundurinn og fjölmiðlamaðurinn Illugi Jökulsson minnist Halldórs Blöndals, fyrrverandi forseta Alþingis og ráðherra, í Facebook-færslu í kjölfar andláts hans. Þar rifjar Illugi upp fyrstu kynni sín af Halldóri þegar hann var ungur blaðamaður á Vísi.

Illugi segir að þegar hann var tvítugur hafi hann tekið röð stórra helgarviðtala við ýmsa Íslendinga, meðal annars stjórnmálamenn, þrátt fyrir að áhugi hans á íslenskri flokkapólitík hafi verið lítill á þeim tíma.

„Einu sinni datt mér í hug að taka viðtöl við til þess að gera unga íslenska stjórnmálamenn þó ég hefði þá nær engan áhuga á íslenskri flokkapólitík og hefði lítið fylgst með því ati öllu,“ skrifar Illugi.

Hann hóf þá viðtalsröðina á Jóni Baldvini Hannibalssyni og Svavari Gestssyni, en segir að næst hafi komið að fulltrúum Sjálfstæðisflokksins og Framsóknarflokksins. Hann hafi þó haft eitt skilyrði.

„Eina skilyrðið var að viðkomandi þurfti að vera skemmtilegur.“

Illugi segist ekki hafa verið sannfærður um yngri kynslóð Sjálfstæðismanna á þeim tíma og leitaði ráða hjá móður sinni, sem benti honum á Halldór Blöndal.

„Svo ég fór og tók viðtal við Halldór Blöndal og hann tók mér fagnandi og viðtalið tókst svona ljómandi vel, fannst mér, enda var Halldór vissulega með skemmtilegri mönnum,“ skrifar Illugi.

Hann segir hlýju hafa fylgt honum í garð Halldórs allar götur síðan og að Halldór hafi haldið áfram að vera „með skemmtilegri mönnum í íslenskri pólitík“. Síðustu kynni þeirra hafi verið í heita pottinum á Seltjarnarnesi fyrir fáeinum árum.

„Hann fór eitthvað að hnotabítast við mig út af einhverju sem ég hafði sagt eða skrifað um pólitík en allt var það í mestu góðsemi og húmor,“ segir Illugi.

Í lok færslunnar vottar Illugi aðstandendum Halldórs samúð sína og þakkar honum sérstaklega fyrir viðtalið sem þeir áttu fyrir 45 árum.

„Nú er Halldór látinn og ég votta ástvinum hans og afkomendum alla mína hluttekningu, og þakka honum sjálfum fyrir þetta ágæta viðtal fyrir 45 árum.“

Að lokum bætir Illugi við léttum tón:

„Það má svo fylgja sögunni að ég fann aldrei skemmtilegan Framsóknarmann.“