Frumlegir trúboðar komu til Reykjavíkur til þess að setja upp gjörninga og dreifa boðskap evangelískar kristnitrúar. Hópurinn ber nafnið trEd og er frá Tulsa í Oklahoma í Bandaríkjunum. Þau setja upp dansatriði með trommuslátt undir á götum borgarinnar og tala síðan við áhorfendur um boðskap Jesú Krists.

Hjónin Nate og Leah Nelson stofnuðu trúboðahópinn árið 2007 og hafa ferðast víða um Bandaríkin með meðlimum sínum. Þau ferðast einnig um heiminn og er Ísland 35. landið sem þau koma til. Þau verða hér í viku áður en þau halda áfram til Zagreb í Króatíu.

Þessi tveggja vikna trúboðsferð er auglýst á vefsíðu trEd en umsækjendur gátu búist við að borga 3.500 bandaríkjadali eða um 590 þúsund íslenskar krónur ef þau yrðu fyrir valinu. Hópurinn tekur þó einnig á móti frjálsum framlögum til að niðurgreiða ferðir sínar.

Í myndbandi á Facebook síðu hópsins þakka hjónin fylgjendum sínum fyrir að vera hluti af því að senda þau til Evrópu að dreifa boðskap evangelista. „Við sáum frelsanir, áttum samtöl við múslima og sáum margt frábært gerast. Svo dagur eitt hefur verið æðislegur,“ segir Leah Nelson í myndbandinu.