Uggi Þórður Agnarsson, hjartalæknir, lést 19. september á líknardeild Landspítalans í Kópavogi, 75 ára að aldri. Hann fæddist í Reykjavík 19. nóvember 1949 og ólst þar upp. Mbl.is sagði frá andlátinu.

Foreldrar hans voru Agnar Þórðarson, rithöfundur, leikskáld og bókavörður, og Hildigunnur Hjálmarsdóttir, fyrrverandi innheimtustjóri Ríkisspítalanna í Reykjavík.

Uggi lauk stúdentsprófi frá Menntaskólanum í Reykjavík árið 1969 og embættisprófi í læknisfræði frá Háskóla Íslands 1976. Hann gekkst undir VQE-próf í Bandaríkjunum 1978 og FLEX-próf 1982, lauk sérfræðiprófi í lyflækningum frá New Britain General Hospital í Connecticut 1983 og sérfræðiprófi í hjartasjúkdómum frá St. Frances Hospital and Medical Center í Hartford og University of Connecticut Health and Medical Center í Farmington árið 1985.

Á árunum 1985–86 hlaut hann styrk frá American Heart Association til rannsókna á raffræði hjartavöðvafruma við University of Connecticut. Hann starfaði sem sérfræðingur við Rannsóknarstöð Hjartaverndar 1986–2001 og einnig við lyflækningadeildir Landspítalans og Sjúkrahúss Akraness.

Hann var yfirlæknir við MONICA-rannsóknir Hjartaverndar og Alþjóðaheilbrigðisstofnunarinnar (WHO) og síðar sérfræðingur við hjartadeild Landspítalans. Árin 1989–90 gegndi hann starfi staðgengils yfirlæknis hjartadeildar Lanssjukhuset í Borás í Svíþjóð. Síðustu starfsárin var hann hjartalæknir á Læknasetrinu í Mjódd og hætti störfum í júní 2025.

Uggi sat í stjórn Hjartasjúkdómafélags íslenskra lækna 1992–98 og gegndi þar formennsku um tíma. Hann var meðhöfundur fjölda greina í Læknablaðinu og erlendum tímaritum um hjarta- og æðasjúkdóma og ritaði einnig greinar í íslensk dagblöð og tímarit. Hann var félagi í Evrópusamtökum hjartalækna frá 1997 og starfaði við kennslu við læknadeild Háskóla Íslands sem klínískur dósent.

Uggi hafði mikla ánægju af útivist, fjallgöngum, skíðaíþróttum og skák. Hann átti sér athvarf í Skorradal þar sem hann dvaldi oft ásamt fjölskyldu sinni.

Eftirlifandi eiginkona hans er Margrét Guðnadóttir (f. 1951), listakona og hönnuður í Kirsuberjatrénu. Börn þeirra eru Ísold (f. 1975), kvikmyndaleikstjóri; Úlfur (f. 1976), matreiðslumeistari; og Embla (f. 1987), verkefnastjóri við Listaháskóla Íslands. Barnabörn þeirra eru Heimir, Röskva, Birna og Uggi.