Inga Sæland, mennta- og barnamálaráðherra, og Heiða Björg Hilmisdóttir, borgarstjóri í Reykjavík, undirrituðu í dag samning um að styðja við og auka aðgengi barna og ungmenna á aldrinum 16–25 ára að skipulögðu frístunda- og félagsstarfi í Breiðholti en greint er frá þessu í tilkynningu frá yfirvöldum.
Samningurinn er liður í aðgerðum stjórnvalda gegn ofbeldi meðal barna.
„Ofbeldi meðal barna er ekki eitthvað sem við getum búið við sem samfélag. Það þarf að taka á vandanum af festu og á víðum grunni með öflugu samstarfi og samfélagsátaki. Við viljum styðja við ungmenni í viðkvæmri stöðu og öflugt félags- og frístundastarf er lykilvarða á þeirra vegferð,“ sagði Inga Sæland, mennta- og barnamálaráðherra.
„Fjármagn í fræðslu og forvarnir getur haft afgerandi áhrif á líf ungmenna. Það er skylda okkar sem samfélags að gera allt sem við getum til að koma í veg fyrir að börn lendi á refilstigu og þessi samningur er mikilvægur í því ljósi. Frístundir og öflugt félagsstarf er meðal þess sem við getum gert til að tryggja að öll tilheyri,“ sagði Heiða Björg Hilmisdóttir, borgarstjóri.
Samkvæmt yfirvöldum sýna rannsóknir að skipulagt frístundastarf eykur vellíðan ungmenna, styrkir félagsleg tengsl og dregur úr líkum á neikvæðum afleiðingum eins og einangrun og vanlíðan. Starfið veitir ungmennum öruggan vettvang til að hitta jafnaldra og kynnast uppbyggilegum tómstundum undir handleiðslu fagfólks.
