Nokkrir finnskir þingmenn hafa greint frá því að óboðnir gestir hafi farið inn á heimili þeirra í fjarveru þeirra, að því er finnska ríkisútvarpið Yle greinir frá.

Atvikin áttu sér stað á síðastliðnu ári. Ekkert var tekið úr húsunum en þingmennirnir sögðu greinileg merki hafa verið um að einhver hefði farið þar inn. Meðal annars höfðu hurðir verið skildar eftir opnar og ljós kveikt.

Jussi Halla-aho, forseti finnska þingsins, sagði að mögulega hefði verið um vísvitandi aðgerðir að ræða.

Ekki hefur verið upplýst nákvæmlega hversu margir þingmenn urðu fyrir þessu, en Yle áætlar að þeir séu færri en 20. Halla-aho sagði að þingmennirnir tilheyrðu ekki sama stjórnmálaflokki og ættu ekkert annað sameiginlegt sem gæti skýrt atvikin.

Petteri Orpo, forsætisráðherra Finnlands, sagði að erlendir aðilar gætu staðið á bak við innbrotin.

„Ef einhver reynir að grafa undan stöðugleika Finnlands, veikja öryggistilfinningu okkar eða draga úr stuðningi okkar við Úkraínu, til dæmis, þá hefur það þveröfug áhrif,“ sagði Orpo.

Forsætisráðherrann sagði jafnframt að Rússland hefði áður reynt að hafa áhrif á kosningar í Evrópu.

Næstu þingkosningar í Finnlandi fara fram í apríl 2027.