Úrskurðarnefnd velferðarmála hefur fellt úr gildi ákvörðun umdæmisráðs barnaverndar um óboðað eftirlit með heimili drengs og samþættingu þjónustu undir stjórn barnaverndar. Nefndin taldi gögn málsins ekki sýna fram á að aðstæður drengsins væru óviðunandi. Úrskurðurinn var birtur af stjórnvöldum þann 1. október á vefsíðu Stjórnarráðs Íslands.
Málið hafði verið til meðferðar hjá barnaverndarþjónustu frá sumrinu 2024 og höfðu alls borist sex tilkynningar vegna fjölskyldunnar. Foreldrar drengsins sögðu tilkynningarnar tengjast alvarlegum veikindum móður hans og þeim breyttu aðstæðum sem fjölskyldan hefði þurft að aðlagast.
Umdæmisráð hafði í desember 2025 úrskurðað að óboðað eftirlit skyldi vera með heimili drengsins í sex mánuði og að þjónusta í þágu farsældar hans yrði samþætt. Kröfu barnaverndar um að drengurinn skyldi sæta sálfræðimeðferð án samþykkis foreldra var hins vegar hafnað.
Foreldrarnir kærðu ákvörðunina og töldu meðal annars að barnavernd hefði ekki gætt meðalhófs eða jafnræðis. Barnaverndarþjónustan hafnaði því og sagði áhyggjur hafa verið af aðbúnaði drengsins og samstarf við föður hans ekki skilað viðunandi árangri.
Í niðurstöðu úrskurðarnefndarinnar kemur fram að fjölskylduaðstæður drengsins séu erfiðar vegna alvarlegra veikinda móður hans. Heilsa drengsins virðist þó nokkuð góð og honum líði vel bæði í skóla og heima.
Nefndin taldi fjölskylduna þurfa þjónustu sveitarfélagsins og gott samstarf við yfirvöld. Gögn málsins bæru hins vegar ekki með sér að nauðsynlegt væri að halda áfram eftirliti barnaverndar með heimilinu.
Var úrskurður umdæmisráðsins því felldur úr gildi.
