Össur Skarphéðinsson, fyrrverandi ráðherra Samfylkingarinnar, gagnrýnir Hildi Sverrisdóttur, þingmann Sjálfstæðisflokksins, harðlega í Facebook-færslu þar sem hann líkir henni við „prinsessuna á bauninni“. Hann segir stjórnarandstöðuna líklega þá slöppustu frá aldamótum og sakar hana um að einblína á smávægileg ágreiningsmál í stað þess að veita ríkisstjórninni raunverulegt aðhald.
Tilefni skrifanna eru viðbrögð Hildar við ummælum Daða Más Kristóferssonar fjármálaráðherra um fjármálastjórn fyrri ríkisstjórna Sjálfstæðisflokksins.
„Hildur Sverrisdóttir rauk upp á nef sér þegar Daði fjármálaráðherra talaði loksins tæpitungulaust um ábyrgðarlausa fjármálastjórn Sjálfstæðisflokksins síðustu sjö árin áður en ríkisstjórn Kristrúnar tók við,“ skrifar Össur.
Hann segir Sjálfstæðisflokkinn hafa skilið eftir sig meiri skuldir en nokkur annar flokkur.
„Enginn flokkur hefur þó skilið eftir sig annan eins skuldaslóða og Sjálfstæðisflokkurinn. Á sjö árum hlóð hann upp samtals 800 milljarða tapi á ríkið. Þennan flór er Daði nú að moka,“ skrifar hann.
Össur vísar einnig til ummæla fjármálaráðherrans á fundi Samtaka ferðaþjónustunnar þar sem hann hafi sagt að „þetta lið“ virtist halda að ókeypis væri að hlaða fjallháum skuldum á ríkið.
Viðbrögð Hildar við orðalaginu urðu Össuri tilefni til háðs. Hann vísar til ævintýrisins um prinsessuna á bauninni og skrifar:
„Hildur hefur síðan gengið eiskrandi um miðlana einsog prinsessan á bauninni sem var svo viðkvæm að hún fékk marblett á sinn konunglega afturenda þegar lætt var lítilli baun undir dúnsængurnar sjö sem hún svaf á.“
Hann segir Hildi hafa tekið sérstaklega nærri sér að vera kölluð „þetta lið“ og spyr hvers vegna stjórnmálamenn bregðist með þessum hætti við beinskeyttum ummælum.
„Til hvers er „þetta lið“ eiginlega í pólitík? Til að kveina í fjölmiðlum þegar talað er umbúðalaust á hreinni og tærri íslensku?“ spyr Össur og bætir við: „Svona fólk er einfaldlega utan erindis; hefur ekkert að segja við þjóðina.“
Össur lætur ekki þar við sitja heldur gagnrýnir einnig Guðrúnu Hafsteinsdóttur, formann Sjálfstæðisflokksins, fyrir að blanda sér í innanflokksmál Flokks fólksins.
„Á sama tíma eyðir formaður Hildar, Guðrún Hafsteinsdóttir, púðri sínu í ræðustól Alþingis til að skipta sér af innanflokksmálum Flokks fólksins og rambar beint í „skítapott“ Ingu Sæland. Er þessi grátkór ekki með réttu ráði?“ skrifar hann.
Að mati Össurar hefur stjórnarandstaðan ekki náð að nýta sér efnahagslegan mótbyr ríkisstjórnarinnar. Hann bendir á að Samfylkingin hafi styrkt stöðu sína í skoðanakönnunum á sama tíma og Sjálfstæðisflokkurinn hafi dalað.
„Þetta er vitaskuld ástæðan fyrir því að þó ríkisstjórnin sé í miðjum efnahagsskafli þá rýkur Samfylkingin upp í Gallup en Sjálfstæðisflokkurinn dalar. Ríkisstjórnin heldur m.a.s. jöfnu í könnunum þrátt fyrir að vera í efnahagslegum mótbyr,“ skrifar hann.
Hann lýkur færslunni með enn harðari gagnrýni á stjórnarandstöðuna og segir hana líklega þá slöppustu frá aldamótum.
„Kristrún og kó munu sigla örugg áfram meðan hún er upptekin af því að vera í fýlu yfir sárasaklausum orðum ráðherra eða átökum innan annarra flokka sem þeim koma ekkert við,“ skrifar Össur.
Að lokum beinir hann aftur spjótum sínum að Hildi og segir hana ætti að einbeita sér að stöðu eigin flokks.
„Prinsessan á bauninni ætti fremur að huga að stöðu eigin flokks en snapa fæting um mál sem engu skipta,“ segir Össur að lokum.
