Fjórar stærstu sælgætisgerðir landsins skiluðu allar hagnaði árið 2025 en aðeins Nói Síríus og Góa-Linda hyggjast greiða hluthöfum arð á þessu ári. Samanlagðar tekjur félaganna námu rúmum 10,5 milljörðum króna.
Vísir greindi fyrst frá.
Nói Síríus er langstærsta fyrirtækið í hópnum en tekjur félagsins námu tæpum 5,5 milljörðum króna. Hagnaður nam 421 milljón króna, samanborið við 246,5 milljónir árið áður. Stjórn félagsins leggur til að 250 milljónir króna verði greiddar í arð. Stöðugildum fækkaði um fimmtán á árinu.
Tekjur Góu-Lindu jukust um 32 prósent og námu tæpum 2,4 milljörðum króna. Hagnaður dróst hins vegar saman úr 183 milljónum í tæpar 165 milljónir króna. Stjórn félagsins leggur til 140 milljóna króna arðgreiðslu.
Helgi Vilhjálmsson, oft kenndur við Góu, á 94 prósenta hlut í félaginu en dætur hans, Kristín, Ingunn og Rut, eiga hver um sig tvö prósent. Miðað við eignarhlut Helga myndu rúmar 131 milljón króna af arðgreiðslunni renna til hans.
Tekjur Freyju námu tæplega 1,9 milljörðum króna og hagnaður 73 milljónum. Stjórn félagsins ákvað að greiða ekki arð.
Kólus var minnst félaganna með 826 milljónir króna í tekjur. Hagnaðurinn nær tvöfaldaðist og nam 85 milljónum króna. Enginn arður verður greiddur úr félaginu.
