Tyrkneskir áhorfendur köstuðu hundruðum leikfanga inn á knattspyrnuvöll í Konya í Tyrklandi í vináttuleik tyrkneska liðsins Tümosan Konyaspor og palestínska landsliðsins. Með þessu vildu stuðningsmenn sýna börnum á Gaza samstöðu sína en leikurinn var haldinn á sérstökum degi í borginni tileinkuðum Palestínu.
Leikföngunum hafði verið safnað saman fyrir leikinn og var þeim kastað úr áhorfendastúkunum inn á völlinn. Með táknrænu framtaki vildu stuðningsmenn vekja athygli á aðstæðum palestínskra barna sem hafa orðið fyrir barðinu á stríðinu.
Knattspyrnuvöllurinn breyttist þannig í vettvang samstöðu með börnum sem hafa þurft að þola nauðungarflutninga, missi ættingja, stöðugar árásir Ísraelshers og miklar breytingar á daglegu lífi sínu. Leikurinn fór 2-2.
Framtakið kemur á sama tíma og börn á Gaza búa áfram við skelfilegar afleiðingar stríðsins. Þar hefur víðtæk eyðilegging og fólksflótti haft alvarleg áhrif á líf barna, auk þess sem skólaganga og fjölskyldulíf hafa raskast verulega. Þá hefur Ísraelsher drepið að minnsta kosti 20.000 börn frá 7. október 2023. Þá er ekkert land í heiminum með jafn mörg börn sem misst hafa útlimi en í Palestínu en fjöldinn skiptir tugum þúsunda.
