Gary Neville hefur óskað eftir því að Sky Sports taki hann af útsendingum frá leikjum Manchester City þar til endanleg niðurstaða fæst í máli félagsins vegna meintra brota á fjármálareglum ensku úrvalsdeildarinnar. Neville lýsti sigri City á Liverpool á Anfield en átti erfitt með að hrósa liðinu, þar sem óvíst er hvort úrslitin muni að lokum standa. City var á dögunum fundið sekt í 114 af 115 ákæruliðum en félagið hefur nú áfrýjað dómnum. Þrír lykilmenn í liði Liverpool léku ekki í leiknum vegna meiðsla en það voru þeir Cody Gakpo, Alexander Isak og Dominik Szoboszlai.
Manchester City lék af öryggi þrátt fyrir fjandsamlegar móttökur á Anfield og náði að þagga niður í vængbrotnum heimamönnum, með hjálp dómarans að sumra mati. Þegar Ryan Gravenberch fékk seinna gulaspjaldið og í kjölfarið rautt spjald um miðjan fyrri hálfleik nýtti City sér liðsmuninn án tafar.
Erling Haaland, Jeremy Doku og Rayan Cherki skoruðu allir á 13 mínútna kafla og tryggðu City sigur. Það var þó Elliot Anderson sem vakti mesta athygli Neville.
Hann hélt aftur af hrósinu vegna málsins sem snýr að fjármálareglum félagsins og sagðist vilja losna undan því að lýsa leikjum City þar til niðurstaða lægi fyrir.
„Þetta er fyrsti leikur Manchester City sem ég lýsi síðan ákærurnar eða niðurstöðurnar um sekt voru kynntar fyrir nokkrum vikum,“ sagði Neville á Sky Sports.
„Við vorum að taka upp hlaðvarpið á þeim tíma og sögðum að ef hægt væri að taka mig af leikjum Manchester City næstu mánuðina, þar til niðurstaða fengist, yrði ég afar ánægður.
Það er mjög erfitt að vinna á Anfield. Við ættum að hrósa City fyrir frammistöðuna án nokkurra fyrirvara, en maður hefur þetta mál alltaf í huga.
Þeir stóðu sig frábærlega í dag. Þeir réðu lögum og lofum síðustu 20 mínúturnar, eftir rauða spjaldið. Þeir héldu vel saman og mér fannst leikmenn á borð við [Gianluigi] Donnarumma, [Ruben] Dias og Anderson standa sig sérstaklega vel í fyrri hálfleik. Þeir stóðu þétt saman sem lið.“
Neville sagði að erfitt væri að líta fram hjá þeim möguleika að niðurstaða málsins gæti breytt stöðu Manchester City verulega.
„Þegar leiknum lýkur er erfitt að horfa fram hjá því að ef niðurstöðurnar um sekt verða staðfestar í janúar eða febrúar verður Manchester City ekki í þeirri stöðu sem félagið er í núna. Þá munu alvarlegar efasemdir hvíla yfir allri úrvalsdeildinni. Það er ekki gott fyrir deildina og þetta ástand gæti varað næstu mánuði. Það er mjög slæmt fyrir úrvalsdeildina.“
Áfrýjunarferlið er hafið en gæti liðið töluverður tími þar til endanleg niðurstaða fæst. Jafnframt stendur yfir málsmeðferð um mögulegar refsingar og er búist við að niðurstaða í þeim þætti liggi fyrir fyrst.
Þrátt fyrir að Neville ætti erfitt með að hrósa City lögðu bæði hann og Jamie Carragher áherslu á að leikmenn liðsins ættu ekki skilið þá fjandsamlegu framkomu sem þeir hafa mátt þola.
„Vandinn fyrir starfsfólk Manchester City, leikmennina og stuðningsmennina er að þau bera enga ábyrgð á þessu máli. Þau þurfa að bera þann stimpil og það orðsporstjón sem fylgir því, þótt þau eigi enga sök á því. Samt þurfa þau að takast á við þetta á vellinum og í stúkunni, viku eftir viku,“ sagði Neville.
Carragher tók undir orð hans.
„Leikmennirnir á vellinum hafa þurft að þola gagnrýnina. Öll athyglin beinist að þessum leik og maður horfir næstum ósjálfrátt upp í heiðursstúkuna og hugsar að það sé fólkið þar sem ætti að vera inni á vellinum og taka á móti allri gagnrýninni.“
