Hin 61 árs DonnaJean Wilde, sem hefur mikinn áhuga á líkamsrækt, sló eigið heimsmet þegar hún hélt plankastöðu í fimm klukkustundir á Huntsman World Senior Games í Utah í Bandaríkjunum.

Wilde tók áskorunina að sér sem hluta af opnunarhátíð leikanna, þar sem íþróttaafrek fólks yfir fimmtugu eru í forgrunni.

Hún hélt plankastöðunni í fimm klukkustundir og bætti þar með eigið heimsmet Guinness World Records. Hún setti fyrra metið árið 2024 þegar hún hélt stöðunni í fjórar klukkustundir, 30 mínútur og 11 sekúndur.

Kyle Case, framkvæmdastjóri Huntsman World Senior Games, sagði afrek Wilde endurspegla vel tilgang leikanna.

„Þetta snýst um að viðurkenna hvar maður stendur í dag og að maður þurfi ekki að hætta, heldur geti haldið áfram að gera það sem maður hefur gaman af,“ sagði Case í samtali við KSL-TV.

Hann bætti við að þótt íþróttir væru í brennidepli leikanna væru fjölmargir aðrir hlutir sem fólk gæti haldið áfram að stunda og njóta eftir því sem það eltist.

Wilde er fyrrverandi aðstoðarskólastjóri og kennari við framhaldsskóla frá Alberta í Kanada. Hún er einnig fimm barna móðir og tólf barna amma.