Kristinn Hrafnsson, ritstjóri Wikileaks, segir áhyggjuefni að Sjálfstæðisflokkurinn og Miðflokkurinn mælist samanlagt með um 40 prósenta fylgi í nýrri skoðanakönnun.
Kristinn bendir á að Samfylkingin bæti við sig fylgi þrátt fyrir harða gagnrýni á ríkisstjórnina vegna efnahagsmála. Hann segir þó að önnur niðurstaða könnunarinnar veki sérstaka athygli.
„Það ætti samt að vera áhyggjuefni að líta á svarta kassann og sjá 40% fylgi við tvo flokka sem keppast í hraðferð að öfga hægrinu,“ skrifar Kristinn í Facebook-færslu.
Bætir hann við: „Þarna finnur þú Ísraelista, aðdáendur AfD, hatusmenn múslima og ESB, andstæðinga LGBTQ+, Tumpista og MAGA-liðsmenn. Þetta eru þeir sem vilja bara skattleggja almúgann - ekki auðmenn, finnst fínt að búa við okurvexti örmyntar í ólígarkaríki og vilja fyrir alla muni slátra RÚV.“
Hann lýsir Sjálfstæðisflokknum og Miðflokknum sem tveimur flokkum sem keppist um sama fylgið og kallar þá samanlagt „Sjálf-mið-flokkinn“.
Kristinn tekur þó fram að hann telji ekki að allir kjósendur flokkanna séu endilega sammála þeirri pólitísku stefnu sem hann telur forystu þeirra boða.
„Raunar er ég ekki viss um að allir kjósendur þessara tveggja flokka felli sig sanntrúaðir undir flörtið við fasismann sem forysta flokkana er að bjóða upp á,“ skrifar hann.
Að lokum vekur Kristinn athygli á því að samanlagt fylgi flokka sem ná ekki fimm prósenta þröskuldinum sé 12,4 prósentustig. Hann segir það einnig áhugaverða niðurstöðu könnunarinnar.
