Sautján ára piltur hefur verið handtekinn og formlega ákærður fyrir morðið á 48 ára konu, Sunshine „Sunny“ Stewart, sem fannst látin í tjörn í Maine eftir að hafa ekki snúið aftur úr einveruferð á róðrabretti.

Samkvæmt dómsskjölum, sem ABC News hefur undir höndum, er drengurinn sagður hafa sýnt „algera fyrirlitningu fyrir mannslífi“ við verknaðinn. Þá kemur fram að hann hafi verið á svæðinu í sumarfríi með fjölskyldu sinni þegar árásin átti sér stað. Saksóknarar hafa farið fram á að málið verði tekið fyrir sem fullorðinsbrot, en sú beiðni hefur ekki enn verið afgreidd.

Drengurinn neitaði sök við þingfestingu í síðustu viku og dvelur nú í unglingafangelsi á meðan hann bíður næsta réttarhalds, sem ákveðið hefur verið að verði 22. ágúst.

Sunshine Stewart hvarf 2. júlí eftir að hafa farið ein á róðrabretti á Crawford-tjörninni í Union, Maine. Hún dvaldi á Mic Mac Cove-tjaldsvæðinu, um hálftíma frá heimili sínu. Lík hennar fannst daginn eftir, 3. júlí, við tjörnina við aðstæður sem lögregla lýsti sem „óvenjulegar“.

Rannsókn réttarmeinafræðings í Augusta leiddi í ljós að hún hafði látist af völdum kyrkingar og höfuðáverka, og dauðsfallið var úrskurðað morð.

Ríkislögreglan í Maine greindi frá því að handtakan hafi átt sér stað miðvikudaginn 17. júlí og að hún hafi verið afrakstur „markvissrar og ítarlegrar rannsóknar“ lögregluliðsins. Drengurinn var færður í Long Creek ungmennamiðstöðina í kjölfar handtökunnar.

Lögregla hefur ekki gefið frekari upplýsingar um hvað tengdi piltinn við morðið eða hvaða aðrar ákærur kunna að liggja fyrir. Rannsókn málsins stendur enn yfir.