Kántrí-goðsögnin, Alan Jackson, hefur tilkynnt að hann muni halda síðustu stórtónleika sína árið 2026, þar sem langvinn barátta hans við Charcot-Marie-Tooth-sjúkdóminn (CMT), hrörnunarsjúkdóm sem hefur áhrif á taugakerfið, hefur gert honum æ erfiðara að koma fram.

„Þetta hefur verið löng og merkileg vegferð,“ sagði Jackson í yfirlýsingu til People 8. október, „og hún hefur leitt mig á staði sem ég hefði aldrei getað ímyndað mér.“

Hinn 66 ára tónlistarmaður mun ljúka ferli sínum á sviði með tónleikunum Last Call: One More for the Road, The Finale, sem fara fram 27. júní 2026 á Nissan-leikvanginum í Nashville, heimaborg hans í Tennessee.

„Ég get ekki ímyndað mér betri stað til að halda lokatónleika og þakka aðdáendum mínum fyrir allt en í Nashville,“ sagði Jackson. „Þar byrjaði þetta allt, í Music City, þar sem Kántrí tónlistin lifir og dafnar.“

Á svið með honum stíga fjölmargir gestir, þar á meðal Luke Bryan, Miranda Lambert, Carrie Underwood og Keith Urban, auk annarra. Bryan sagði í færslu á Instagram að honum væri mikill heiður að taka þátt:

„@officialalanjackson hefur mótað mig í gegnum tónlistina sína í gegnum árin. Ég hlakka ótrúlega mikið til að taka þátt í síðustu tónleikum þessa félaga úr Georgíu á næsta ári.“

Tónleikarnir verða þó ekki aðeins kveðjuhátíð fyrir Jackson heldur einnig tækifæri til að vekja athygli á CMT-sjúkdómnum. Einn dollar af hverjum seldum miða rennur til CMT Research Foundation, sem styrkir rannsóknir á sjúkdómnum.

Jackson greindist með CMT árið 2011 en opinberaði veikindin fyrst árið 2021.

„Ég er með þennan taugasjúkdóm sem ég erfði frá föður mínum,“ sagði hann í viðtali við Today Show. „Það er engin lækning til, og sjúkdómurinn hefur haft áhrif á mig í mörg ár.“

Hann bætti við að hann fyndi sífellt meira fyrir einkennunum:

„Ég veit að ég er farinn að missa jafnvægi á sviði og stundum detta ég næstum, jafnvel þegar ég stend við hljóðnemann. Það er orðið mjög óþægilegt.“

Þrátt fyrir það undirstrikar Jackson að CMT sé ekki lífshættulegur sjúkdómur.

„Hann mun ekki drepa mig,“ sagði hann. „En hann tengist bæði vöðvarýrnunarsjúkdómum og Parkinsonsveiki.“

Jackson segir að veikindin hafi gefið honum færi á að líta yfir feril sinn og skilja eftir það sem honum þyki mestu skipta:

„Ég hef alltaf trúað því að tónlistin sjálf sé það mikilvægasta, lögin. Ef ég á að skilja eitthvað eftir mig, þá vona ég að það sé það.“