Ugla Stefanía Kristjönudóttir Jónsdóttir, starfsmaður Reykjavíkurborgar, spyr hvort Bandaríkin muni sæta sömu gagnrýni og sum Asíulönd ef opinberar aftökur verða aftur að veruleika þar í landi. Hún veltir jafnframt fyrir sér viðbrögðum þeirra sem gagnrýna ofbeldi ákveðinna þjóðernis- og trúarhópa.

Gagnrýnin kemur fram í Facebook-færslu Uglu Stefaníu en í færslunni bendir hún á að ákveðin lönd í Asíu hafi lengi sætt harðri gagnrýni fyrir opinberar aftökur og segir slíkar aftökur vera hrollvekjandi verknað.

„Nú virðast Bandaríkin ætla að bætast í þann hóp (aftur), eins og fátt sé eðlilegra,“ skrifar Ugla Stefanía og á þá við um þau áform Pete Hegseth um að sýna aftöku Nidal Hasan í beinni útsendingu á netinu.

Hún spyr hvort Bandaríkin muni sæta sambærilegri gagnrýni og önnur ríki fyrir slíkar aftökur eða hvort viðbrögðin verði önnur.

Ugla Stefanía beinir einnig sjónum að fólki sem gagnrýnir ofbeldi ákveðinna þjóðernis- og trúarhópa. Hún spyr hvort það fólk muni gagnrýna slíkar aðgerðir í Bandaríkjunum eða styðja þær.

„Ætli þau munu sæta sömu gagnrýni, eða mun fólkið sem er alltaf að tala um hvað ákveðnir þjóðernishópar og trúarhópar séu ofbeldisfullir hvetja leiðtoga vestanhafs til dáða, og klappa með þegar að maðurinn verður skotinn í tætlur af aftökusveit í beinni útsendingu?“ spyr hún að lokum.