Björn Birgisson, samfélagsrýnir frá Grindavík, gagnrýnir Vilhjálm Birgisson og Sólveigu Önnu Jónsdóttur í nýrri Facebook-færslu sem vakið hefur athygli, fyrir afstöðu þeirra til upptöku evru á Íslandi. Hann segir höfnun evrunnar geta komið niður á almenningi með hærri vöxtum og áframhaldandi verðtryggingu.

Í færslunni gagnrýnir Björn einnig það sem hann kallar „hlægilegan meting“ verkalýðsleiðtoganna. Hann vísar þar til deilna þeirra við Höllu Gunnarsdóttur hjá VR vegna ólíkrar nálgunar á framlengingu kjarasamninga. Að sögn Björns hafa Vilhjálmur og Sólveig Anna sakað Höllu um leikaraskap vegna þess að hún vildi fara aðra leið til að framlengja samningana og forðast að þeir yrðu felldir úr gildi.

Segir lægri vexti og afnám verðtryggingar skipta mestu

Megináhersla Björns er þó á gjaldmiðlamálið. Hann segir að hagsmunir skuldsetts almennings felist fyrst og fremst í lægri vöxtum og afnámi verðtryggingar, fremur en hefðbundnum launahækkunum í krónum.

„Hvað er best fyrir skuldugt fólk? Lægri vextir og engin verðtrygging,“ skrifar Björn.

Hann gagnrýnir þá nálgun að leggja megináherslu á þriggja til fimm prósenta launahækkanir og segir slíkar hækkanir geta runnið út í verðlag og ýtt undir verðbólgu.

Að mati Björns hefði upptaka evru getað skapað tækifæri til breytinga á þessu sviði. Hann telur að þeir verkalýðsleiðtogar sem hafi lagst gegn evrunni hafi þar með unnið gegn hagsmunum eigin félagsmanna.

Segir pólitík ráða afstöðunni

Björn heldur því fram að andstaðan við upptöku evru ráðist fremur af pólitískum sjónarmiðum en hagsmunum launafólks. Hann segir að breyting hafi verið í boði en henni hafi verið hafnað vegna þess að þeir sem voru andvígir vildu ekki styðja stefnu ríkisstjórnarinnar.

„Almenningi mun blæða fyrir vikið á komandi árum,“ skrifar Björn að lokum.