Hitler Mussolini Simeón Flores, 45 ára, bar sigur úr býtum í borgarstjórakosningum í Queropalca, héraði í Lauricocha-sýslu norðan við höfuðborgina Lima. Hann bauð sig fram fyrir mið-vinstri flokkinn Ahora Nación.
Simeón Flores hlaut 229 atkvæði, eða 34,5 prósent af 663 gildum atkvæðum í héraðinu. Næstur honum kom Gaspar Benilde Osorio Zambrano, frambjóðandi flokksins Popular Renewal Peru, með 204 atkvæði, eða 30,8 prósent. Munurinn var því aðeins 25 atkvæði.
Samkvæmt opinberum tölum frá árinu 2024 búa rúmlega 730 manns í héraðinu.
Simeón Flores stýrir einnig fjárfestingafélaginu Simeon Sac í Pillco Marca.
Ekki fyrsti maðurinn að nafni Hitler sem nær kjöri
Kosningarnar voru hluti af svæðis- og sveitarstjórnarkosningum sem haldnar voru víðs vegar um Perú í kjölfar sigurs hægrisinnaða stjórnmálamannsins Keiko Sofía Fujimori í forsetakosningum landsins.
Þetta er ekki í fyrsta sinn sem maður að nafni Hitler nær kjöri í Suður-Ameríkuríkinu.
Hitler Alba, sem bauð sig fram fyrir mið-hægriflokkinn We Are Peru, gegndi embætti borgarstjóra í öðru litlu héraði í Andesfjöllum, Yungar, á árunum 2011 til 2014.
Árið 2018 bauð hann sig aftur fram og keppti meðal annars við Lennin Vladimir Rodriguez Valverde, sem reyndi að fá framboð Alba ógilt. Alba sigraði aðra frambjóðendur og hlaut 47,7 prósent atkvæða.
Alba kallaði sig „góða Hitler“ og notaði slagorðin „Hitler snýr aftur“ og „Hitler með fólkinu“ í kosningabaráttunni.
Hann sagði á sínum tíma að faðir hans hefði ekki þekkt til arfleifðar Adolfs Hitlers, einræðisherra nasista í Þýskalandi, þegar hann valdi syni sínum nafnið.
Þingmaður og skurðlæknir hét einnig Hitler
Hitler Saavedra, þingmaður og skurðlæknir, sat á þingi Perú fyrir flokkinn We Are Peru frá árinu 2021 þar til hann lést árið 2024, þá 46 ára að aldri.
Það er ekki óalgengt í Perú að foreldrar gefi börnum sínum söguleg eða á annan hátt óvenjuleg nöfn, jafnvel þótt þau hafi neikvæðar eða umdeildar tengingar.
