Ísrael verður að tryggja öryggi og mannréttindi allra einstaklinga um borð í skipunum Conscience og öðrum skipum úr Frelsisflotanum (e. Freedom Flotilla Coalition) sem stöðvuð voru á dögunum, segir sérfræðingur Sameinuðu þjóðanna.

„Þessi árás á óvopnaða borgara á úthafinu er enn eitt brotið á alþjóðalögum af hálfu Ísraels,“ sagði Irene Khan, sérfræðingur SÞ um tjáningarfrelsi.

Skipin voru stöðvuð á alþjóðlegu hafsvæði af ísraelskri herþyrlu aðfaranótt miðvikudags (8.), á sama tíma og ísraelska sjóhernum tókst að komast um borð. Talið er að aðgerðin hafi átt sér stað á alþjóðlegu hafsvæði, í trássi við alþjóðalög. Meðlimir flotans voru handteknir og er greint frá því að þeir séu fluttir til hafnar í Ashdod.

Aðalskip flotans, Conscience, var með 92 farþega um borð, þar á meðal blaðamenn, heilbrigðis- og umönnunarstarfsfólk og aðra mannréttindafrömuði sem ætluðu að brjóta ísraelska landblokkunina á Gaza. Sextán af farþegunum voru erlendir blaðamenn frá tíu löndum sem störfuðu fyrir meira en tugi fjölmiðla. Eins og alþjóð veit er íslenska söngkonan Magga Stína meðal fanga Ísraelshers.

Khan lýsti yfir miklum áhyggjum af öryggi þeirra sem nú eru í haldi, sérstaklega í ljósi frásagna aðgerðarsinna í Global Sumud Flotilla sem greindu frá illri meðferð í ísraelsku fangelsi.

„Ísrael ber skyldu til að tryggja réttindi allra sem eru handteknir af handahófi, þar á meðal aðgang að heilbrigðisþjónustu og vernd gegn pyntingum og annarri illri meðferð,“ sagði Khan. „Við hvetjum Ísrael til að veita þeim tafarlausan aðgang að lögfræðingum sínum og fulltrúum sendiráða,“ bætti hún við.

Khan sagði að „þessir hugrökku blaðamenn hafi siglt í samstöðu með palestínskum blaðamönnum á Gaza sem hafa borið hitann og þungann af því að segja frá stríðinu við mikla lífshættu. Yfir 252 palestínskir blaðamenn hafa látið lífið, og margir þeirra voru vísvitandi skotmark til að stöðva fréttaflutning af stríðsglæpum.“

Hún sagði að markmið erlendu blaðamannanna um borð í Conscience hafi verið að brjóta gegn fordæmalausu banni Ísraels á aðgangi erlendra fjölmiðla að Gaza. „Hugrekki blaðamannanna á Gaza og í Frelsisflotanum má ekki hafa verið til einskis. Alþjóðasamfélagið verður að krefjast þess af Ísrael að veita erlendum fjölmiðlum tafarlausan og frjálsan aðgang að umsátrinu á Gaza og tryggja öryggi allra blaðamanna þar,“ sagði hún.

„Þeir sem stöðvaðir voru hafa rétt til tjáningarfrelsis og til að sýna samstöðu með palestínsku þjóðinni og veita henni aðstoð,“ sagði sérfræðingurinn. „Ísrael ber skylda til að virða þessi réttindi.“