Lögreglu í Þrándheimi í Noregi barst tilkynning klukkan 14.51 um að maður á sjötugsaldri hefði verið stunginn með hnífi fyrir utan stofnun í borginni. Lögregla hafði fljótlega hemil á meintum árásarmanni, sem er karlmaður á þrítugsaldri og búsettur á stofnuninni.

„Áverkinn virðist ekki alvarlegur. Um er að ræða skurð fyrir ofan auga sem sjúkraflutningamenn settu umbúðir á,“ segir Håvard Okan Lossius, stjórnandi aðgerða hjá lögreglunni.

Upphaflega var greint frá því að báðir mennirnir væru búsettir á stofnuninni, en lögregla hefur leiðrétt þær upplýsingar. Maðurinn sem varð fyrir árásinni er nágranni stofnunarinnar.

Lögregla segir við norska miðilinn Adresseavisen að lögreglumenn hafi verið vopnaðir þegar þeir komu á vettvang. Starfsfólk stofnunarinnar hafði tilkynnt um atvikið.

Ákærður fyrir árásina

Aðgerðastjóri lögreglu á vettvangi segir við Adresseavisen að deilur hafi komið upp og að hinn grunaði hafi beitt hnífi.

Engin tengsl voru milli mannanna tveggja áður en atvikið átti sér stað.

Manninum sem varð fyrir árásinni hefur verið boðin aðstoð frá áfallateymi sveitarfélagsins, sem mun fara á vettvang til að ræða við hann.

Maðurinn á þrítugsaldri hefur verið ákærður og hefur lögregla lagt hald á hnífinn. Ekki verður farið með hann á lögreglustöð, heldur mun starfsfólk stofnunarinnar annast hann.