Samkvæmt fyrstu niðurstöðum rannsóknarnefndar flugslysa (NTSB) slitnaði vinstri hreyfill fragtflugvélarinnar, 34 ára gamallar McDonnell Douglas MD-11, frá UPS sem hrapaði rétt eftir flugtak, frá vængnum í flugtaki.

Öryggismyndavélar á flugvellinum sýndu hvernig hreyfillinn losnaði, eldur blossaði upp við vænginn og vélin missti stjórn áður en hún skall til jarðar.

Mikið eldhaf varð þegar fragtflugvélin skall á iðnaðarbyggingum skammt frá Louisville í Kentucky á þriðjudag, aðeins augnablikum eftir að hún tók á loft frá Muhammad Ali-flugvelli borgarinnar. Alls létust tólf manns í slysinu, þar á meðal áhafnarmeðlimir og nokkrir starfsmenn á jörðu niðri.

Todd Inman, fulltrúi NTSB, sagði á blaðamannafundi:

„Við höfum skoðað upptökur úr öryggismyndavélum sem sýna vinstri hreyfilinn losna frá vængnum þegar flugvélin var að fara á loft. Stuttu síðar sást mikill eldmökkur við vinstri vænginn.“

Inman bætti við að brak úr flugvélinni dreifðist um hálfrar mílu svæði og því væri ólíklegt að finna fleiri lifandi af slysstaðnum.

Flugvélin, sem var á leið til Honolulu, náði að lyftast örlítið áður en hún hrapaði handan flugvallargirðingarinnar og skall á fyrirtækjunum Kentucky Petroleum Recycling og Grade A Autoparts. Eldhnöttur lýsti upp næturhimininn og kviknaði mikill eldur sem breiddist út um iðnaðarsvæðið.

Andy Beshear, ríkisstjóri Kentucky, lýsti yfir neyðarástandi á miðvikudagsmorgun til að tryggja aðstoð og björgunarstarf.

Craig Greenberg, borgarstjóri Louisville, staðfesti síðar að tólf hefðu látist og ellefu til viðbótar særst. Þar á meðal voru þrír áhafnarmeðlimir UPS, nokkrir starfsmenn á svæðinu og eitt barn.

„Ég er mjög sorgmæddur að þurfa að tilkynna að dauðsföllin eru nú orðin tólf og enn er leitað að nokkrum einstaklingum,“ skrifaði Greenberg á X.