Lögreglan á höfuðborgarsvæðinu hefur undanfarið fengið nokkrar tilkynningar um vasaþjófnað, og varar nú almenning við þjófum sem virðast vera virkir í umdæminu. Þrjú mál hafa verið tilkynnt á skömmum tíma þar sem greiðslukortum var stolið og notuð til að taka út fé.

Í tveimur málanna voru brotaþolar eldri karlmenn, komnir yfir eftirlaunaaldur. Lögreglan telur að þjófarnir hafi fylgst með þeim slá inn PIN-númer í verslunum, elt þá síðan og stolið veskjum þeirra úr vösum. Þjófarnir gátu þannig auðveldlega tekið út talsverðar fjárhæðir af reikningum mannanna.

Þriðja málið tengist erlendum ferðamanni sem varð fyrir barðinu á vasaþjófum í grennd við Hallgrímskirkju. Þeir stálu greiðslukortum hans áður en þeir komust undan.

Lögreglan minnir almenning á að gæta sérstakrar varúðar þegar PIN-númer eru slegin inn, og að geyma ekki upplýsingar um númerin með greiðslukortum.